Ka sorkar Meghalaya u thoh noh ko cha ka National Council of Educational Research and Training (NCERT) yow paan bor yow pynemkaam ya ki kot yong ka nadooh Class-I hadooh Class-X neibynta u snem puræ wa daw wan.
Yeini da pyntip da u Montri ka chnat puræ puthi, u Rakkam A Sangma deiwa ong wa da rai wow thoh noh khlem pynslem cha ka NCERT yow paan bor.
Da ong u ya ki Class XI wa Class XII da dep wow leh yeini i jooh nadooh u snem 2018 wei ka sorkar da dep ko wow rai yow pynemkaam noh ya ki kot ka NCERT nadooh Class-I hadooh Class-X.
Ya ka yalang wow boodien yeini i rai ka sorkar da pynman ynne neibhah da emkaam wow pyndep noh ya ini i kaam wow pynkhreh ya ki kot puræ neibhah ki skur u sdang noh ki pyn na u Thohlakhmi (Feb) u snem wow wan, kamtæ da emkaam wow yoh bor chwa yow ye u pyndep yeiwa emkaam kamjooh yow chon ya kini ki kot skur.
U Montri da pyntip u leh wa ka chnat da thung ko yaka Scrutiny Committee kawa daw kynthup lang ya ki bru wa chemphang kam ki dkhot yow pait ya ki lynnong wow em ha kini ki kot toh kiwa biang wei wow pyndam ya ki wym yahaap wa i man ka jylla.
Chooh chooh da ong u wa ka sorkar da kreh chitom ko wow wanrah smat yaka State Curriculum Framework yow chna leh yaka Syllabus kawa miat wei mar ya dep pynkhreh yeini, neiliang ka MBOSE, ka DERT waka chnat puræ puthi daw sdang ki wow pynkhreh ya ki kot, u jied yeiwa emkaam wei wow pyndam ya ki wym emkaam deiwa pyrkhat yaka jylla.
Da pynche u leh wa ym pynemkaam waroh iwa em ha ki kot ka NCERT tangwa daw thap leh ya iwa yong ka jylla wei mar ya yoh bor naka NCERT daw leh noh wut-wut yow yoh ki skur u sdang khlem da thut.
Discussion about this post