Hadien wa chem ya i metyap ka kynthai ha Chahtngit, Jowai ha i step yong ka 4 tarik wa i oor kawi ka kari hajan i thaw wa chem ya i metyap, ki paidbah da phylla ki wa kammon wei neiyi i daw wa khlaad ko.
Da pynsuba leh ya ki paidbah heiyatoh wa i rukom wa yap ko wa i rukom wa smat sai ya ka kari khlem em wa tip wa em ini i metyap ka kynthai hajan ini i thaw.
Ynne ka sngi hawa yaklam wa u SP ka West Jaiñtia Hills, u Bikram D. Marak da ong u wa hadien wa chem yeini waroh da kem ya u bru uwa suba, uwa man leh u tre ka kari.
Da pyntip u wa katkam wa man katni ympu ye u ong yei daw wa yap kani ka kynthai wei yi wa emkti wow leh ya ini i kaam neibhah wa i takit dang lai i chaphrang wei dang yang leh ya ka Bui (Report) yong ka Postmortem, ka Crime Scene Unit (CSU), ka chnat Forensic wa kiwi kiwi.
Da pyntip u leh wa hadien wa kem ya uwi uwa da suba emkti uwa man leh u tre ka kari, hadien ini da ye wow tipmit (Identify) ya i metyap.
Hawa kylli won lada u tre ka kari wa kani ka bru yatipmit ki iwi ya iwi, neiliang u Marak da ong u wa ye ki wow ya tipmit neibhah hadien wa kem ya uwa suba da ye wow tip chaphang yong kani ka kynthai.
