Kiwa yahkhmat ka HITO Jowai Circle, ynne da yoh ki wow yachem wa ka Montri ka chnat i chait i khiah ka jylla, ka Dr. Ampareen Lyngdoh hajrong kiwa boon ki kaam heiwa da pyntip cha ka leh yei hap pynemkaam da ki Generator ha Jowai Civil Hospital heiwa ini dapoi i lutsan hadooh Rs. 8-9 hajar chi sngi.
Da yaklam leh yeiwa emkaam u booh Nursing School ha Jowai kawa da em hok wow em kam kani tangwa da chah kyrriah noh ko.
Neiliang u Owansakhi Paswet, President ka HITO Jowai Circle da kyntu u ya waroh ki MLA ka Ri-loom Jaiñtia Hills wow pynbor ya ka sorkar jylla wow pynman noh yeiwa kular wow chna ya ka Nursing School ha Jowai, ka nongbah yong ka West Jaiñtia Hills neibhah em ko biang ki thaw sumaar yow yarap ya kiwa lai puræ Nurse khamtam ha ka Practical Training.
U Owansakhi da ong u leh wa ha u snem 2012, ka sorkar jylla da mang ko wow chna ya ka Nursing School ha Jowai tangwa hadooh katni ya kani ka Nursing School da kyrriah cha Baghmara, South Garo Hills ka wym em biang ki thaw wa emkaam katkam wa da booh kyndon ka Indian Nursing Council.
Chooh chooh da ong u wa waroh ki MLA khamtam u MLA ka Jowai Constituency u Wailadmiki Shylla toh u bahkhlieh u lada jia iwon iwon lada ka seiñ wa ki paidbah u yakhih wow pyrchah ya i kyrriah ya ka Nursing School cha Ri-loom Garo.
Discussion about this post