Shillong: Ka Working Committee ka Shillong All Faith Forum (SAFF) wa kynthup ya kiwa yahkhmat ki niam waphær waphær da rai ki wow yachem waka sorkar jylla haka 7 tarik uni u bnai yow yaklam yei long i man heiyatoh wa u COVID-19 hapoh ka jylla wei wow wai noh ya ki thaw mane Blai.
“Daw yachem i wa u montri rangbah haka sngi nyngkong wei daw pynman sa kawi ka yalang ka Forum chwa wow pynbna paidbah yeiwa hap leh heiyatoh wow wai biang ya ki thaw mane Blai,” da ong u Purely Lyngdoh, President ka Forum hadien wa wai ka yalang ka Forum ynne ka sngi ha Shillong.
Da kyrmen u leh wa daw ye u wai biang ya ki thaw mane Blai ym slem de deiwa ong, “I da yoo i yaka hukum ka sorkar pyrdi wei haka yalang ynne ka sngi da yaklam yillu wei da chim leh ya i e yumut wa kiwa hap wow leh.”
Da ong leh wa kani ka khlam da ktah ko ya waroh wei sñiawthooh hi leh wa ki paidbah angnood ki wow wai noh ya ki jar jiar ki thaw mane Blai kiwa da khang nadooh u Wisu (March), da pynrap u deiwa ong wa ym ye wow kheiñstiñ ya u COVID- 19 neibhah lada em uwi wa yoh, daw poor ko cha waroh wei na ini i daw hap man kiwa husiar bha wei ym toh u chim yaka rai wa jhan.