Ka seiñ Khasi Jaiñtia National Union (KJNU) da ujor FIR ko ha u SP ka West Jaiñtia Hills pyrchah ya ki pulit ka Ummulong Beat House deiwa pynbaad wa da booh ki yaka Check Gate ha u sarok Jowai By-pass ha ki thaw wa haap ha Mukhla-Thadlaskein yow chim poisa pyrchah yaka aiñ na ki kari wa lai luti na uni u sarok da boon bnai kattu.
Ka seiñ da ong ko wa ya uni u sarok da pynemkaam da ki kari na kiwi ki jylla kam na Assam wa Mizoram kiwa lai wa wan da ki hajar tylli chi sngi wa kynthup ya ki kari heh wa ki kari khian.
Tangwa ka seiñ da ong ko wa ha kini ki Check-Point da em ki bru kiwa ym em sap sula pulit kiwa khrong poisa na ki Truck da boon bnai hadooh ha i por sngi heiwa ki pulit wa em ha kani ka thaw ym em leh ki iyi iyi pyrchah ya kini ki bru.
Kamtæ ka seiñ da ong ko wa ini i wym leh ki pulit iyi iyi pyrchah ya kini ki bru toh wa da em i ya sñiawthooh wa i ya krehlang hapyrdi ki arliang.
Ka seiñ da ong ko leh wa ini i khrong poisa toh i dai sarom yaki bru ka Meghalaya khamtam ya ki pulit ka Meghalaya neidaw wa ki Check-Point ym toh ki thaw khrong poisa wei ki thaw wa ki pulit u leh ki yei kamram yong ki wei wow pyndooh yaki kaam pyrchah yaka aiñ.
Kamtæ da kyntu ya u SP wow kem u ya kiwa emkti ha kini ki kaam wei wow pynchitom yaki katkam ka aiñ.
(Feature Image-File Photo)
