Heiyatoh wa i em uwa kam ya i thaw chnong ha ki bynta wa daw lai u sarok 4-Lane uwa tip leh kam u Greenfield High Speed Corridor iwa da pynmih khubor leh da ka HNYF – Jaiñtia Zone, neiliang ka chnong Thadmuthlong C Phramer, da sñiawkhia ko wei da pynche ko heiyatoh wa ini deiwa ong wa da chimkhia ko yeini neibhah wa toh i thaw yong ka chnong wei ka bai thaw (Compensation) leh toh u man i yong ka chnong.
Heiyatoh wa ini da ong wa kam ka chnong da chimkhia ko wei ka chnong tip ko wa u Tommy Shylla da pynemkaam næ kam u da i pyrtuid yong oo ya ki thaw ka chnong wa daw lai uni u sarok.
Da ong leh wa ini i kaam da man iwa sñiawkhia neibhah ki thaw chnong ymtoh ki yong ki bru samen wei ym em yatoh ki wei pyrtuid ki bru samen wei ki bru samen ym ye ki u thap pyrtuid khlem da tip da yoh mynjur næ tipmit ka chnong.
Chooh chooh ka chnong da ong ko wa tip bniah ko yeini hadien wa yoo ya ka Gazette of India wa kiwi ki kot wa yatoh wa ka Project iwa pynman ya ka wow pyntikna na ki bor wa toh u pait yeini.
Da pynche leh wa kam ka chnong ym em pyrchah ko ya uni u sarok Greenfield High Speed Corridor wa ki kaam pynroi tangwa pyrchah joor ko ya kiwon kiwon kiwa pyrchang wow wan kam, wow pynpsiah pynkylla pyrtuid næ wow pynyoo wa yei thaw ka chnong kam ka thaw ki bru samen khlem da yoh bor.
Neiliang ka chnong da booh ko leh ya ka ujor ha ki bor District ha ka 20 tarik uni u bnai heiwa da booh ya ka FIR ha Phramer Traffic Cell wow kem ya u Tommy Shylla wa kiwa emkti hajrong ini i kaam.
Da kyrpaad leh ya ki bor sorkar wow pynman yei takit wa bñiah wa laitlooid wei kawa khooid khnang wow chemdien yeiwa sakhiat boi dang em chooh kiwi kiwa leh ya kam ini i kaam.
Heijooh i por da kyntu wa lada chem wa em kiwa embynta, næ pyrchang pynkylla, wow kam, u pynpsiah næ pynemkaam bakla ya ki thaw chnong, ka chnong dawa ko na ki bor sorkar wow pynchitom ya ki katkam ki kyndon aiñ.
Discussion about this post