Ka Hynniewtrep Integrated Territorial Organization (HITO) West Jaiñtia Hills District hapoh i yahkhmat u General Secretary, u Crisence Ksoo wa u Finance Secretary, u Wanbiang Pulang wa u General Secretary ka seiñbei u Wanbun N Dkhar ynne ka 17 tarik da e dorkhat ko ha u Deputy Commissioner ka West Jaiñtia Hills District, u BS Sohlyia hajrong i wym biang i rukom thaw ya u khoo rachon namo PDS wa NFSA kiwa pynpoi ya u khoo da ki Wholesaler cha ki Dealer yong ki chnong waphær waphær hapoh ka West Jaiñtia Hills District.
Ka seiñ hadien wa yoh ujor na ki kattu katni ki Dealer da lai yachem noh ko ya u DC wow thooh yeiwa sakhiat neibhah ini da wanrah i yei eh i khor ya ki Dealer.
Ka seiñ da ong ko wa ki Wholesaler da kam ki wa u khoo toh uwa 50 kg chi churia tangwa i khia won man u 34-40 kg chi churia wei ini i duna dapoi hadooh 10-16 Kg chi churia.
Ha i yaklam wa u DC da ong u wa kani ka ujor toh kawa nyngkong hajrong ini i kaam wei da kular u leh wow chimkhia yeini.
Heijooh i por ka seiñ da kyntu ko ya u DC wa lada ym ye wow khoom u kdoh yeini da toh u e noh ya ki Dealer wow lai thooh khoo ki na FCI.
