Ka Khasi Students’ Union-Laban Circle ynne da lai booh ujor ko ha u DC ka East Khasi Hills hadien wa ood ki paidbah yei rukom pynman ya ka Muharram Procession ha Laban ha ka 26 tarik uni u bani hadooh wa da thut i lai i wan ki kari wei da man ko leh i maa ya kiwa lai luti.
Da pyntip wa ya kani ka Muharram Procession da pynman na Red Cross, Laban cha thaaiñ St. John, Lower Lumparing wei da dong biang cha Red Cross, Laban ha ka 25 tarik wei ha ka 26 tarik won da lai na Red Cross, Laban cheiliang ka laad Shillong Civil Hospital deiwa lai won na u sarokbah ter-ter yow psiah won cha Oxford Hills, K.O.R., Last Stop wa Rhino Point wei da dong biang cha Red Cross, Laban.
Kani ka Procession da yoh bor wow pynman hadooh 9:30 i miet katkam ka hukum u DC tangwa da pteiñ ka hadooh 11:00 waje i miet.
Ka seiñ da yoh ujor ko leh na ki khynnah skur wa neidaw wa joor ood i choh bom wa i ya rwai da pynthut ko yei pynkhreh yaleh Exam.
Da yoh leh ka ujor wa kiwa chimbynta ha kani ka Procession da em kiwa kylleiñ wait, kiwa rah diñ kiwa yoomaa neibhah kammon u jia lada hær i diñ cha kiwa lai luti.
Da kdaw leh wa kani ka Procession da sangeh ko man ka 50-80 Meter yow pynskit ya ki wait wei ini da pynsangeh lut ko yei lai i wan ki kari wa kynthup ya ki Ambulance khamtam ha ki bynta u sarokbah.
Ka seiñ da ong ko wa burom ko ya waroh ki jait niam tangwa ymtoh won u leh deiwa ktah ko yei chongsuk wa i chngaaiñ ki paidbah.
Discussion about this post