Ka seiñ Southern Border Youth Welfare Association, Bataw: Elaka Rymbai & Lakadong, East Jaiñtia Hills District da ujor ko ha ka DM&HO ka East Jaiñtia pyrchah ya ki wakreh ka Bataw PHC wa kynthup ya Doctor wa Staff Nurse.
Ka seiñ da ong ko wa haka 29-08-20 da yoh yutip wa kawi ka bru wa punkhon kawa tip kam ka Family Thamar kawa naka chnong Lakadong Ummat da lai ko cha ka PHC heipor 10:15 i miet yow kha khon tangwa manda poi ha ka PHC da chem wa ym em Doctor wei ym em wa wai hanla ka Nurse em hi wei da yang ki chi slem leh ha PHC.
Kamtæ deiwa ym emlaad de da iwi, kani kawa punkhon da liwan ko cha yung yow kha khon iwa ym em man iwa chngaaiñ yaka wow hap ko wow leh ya ini, ka seiñ da ong ko wa ini ym toh i sien wa nyngkong heiwa da yoh yutip wa haka 30-07-2020 da em kawi ka bru wa wan cha Bataw PHC yow kha khon wei manda poi ko ha PHC heipor kamwa 4 waje i step da chem wa ym em Doctor ym em Nurse ha ka PHC heiwa deiwa chem chitom bha da ye kiwa emyatoh kani ka bru wow li yah ka cha Khliehriat CHC yow kha khon.
Chooh chooh ka seiñ da ong ko wa da pyntip da ki bru kani ka thaaiñ wa kani ka PHC ym em dawai ko wei da hap ki bru wow liwan khlem dawai, kani ka PHC ym em ko leh yaka Ambulance kawa emkaam wow em khamtam cha kini ki thaw wa em cha kdong cha chmiang yow kit ya ki bru wa chitom.
Kamtæ ka seiñ da ong ko wa man i iwa sepai i em katai ka PHC lada ki wakreh yong ka ym leh ki yei kaam yong ki yow sumaar yow chakri ya kiwa dooh wa duk neibhah i thung kreh ya ki ha katai ka thaw ym toh u man ko kam wow lai muja hi-eh, wei toh u pynbiat yeini i tlot i krehkaam kamjooh yow pyndap ya waroh iwa duna kani ka PHC.