Shillong: Ka wi ka manbei na ka chnong Mawlai ynnin ka sngi da lai ujor ko ha khmat u Superintendent of Police (City) ka East Khasi hills, u S. Thamar neidaw wa chah thaad ki dur ko (Private) ha ki Social Media ha u kurim warim yong ka uwa tip pyrtuid kam u Teibor Lyngdoh Mawphlang wa sah ha Mawlai Datbaki, Dong Pata.
Ha kani ka lai ujor da synraan lang ya kani ka manbei da ki dkhot ka HYC Mawlai circle, heiwa neilaing u SP da phah u ya kani ka manbei wow ujor ko cha ka Mawlai Police Station.
Katkam wa pyntip kani ka manbei, ha ka 19 tarik uni u bnai hawa wai ko ya ka Facebook Account yong ka da khyrngiat ko wow yoo yei dur yong wa da chah thaad ko ha u kurim warim yong ka uwa da yalait ko la kattu katni bnai.
Chooh chooh da pyntip ko wa hawa pyrchang wow phah da ka Message wow kyrpaad ya oo wym toh u booh ya ki dur yong ka da jubab kylla u da ki ktieñ wa sih wa sang wei manda phone ka oo leh da klam u da ki ktein wa sih wa sang wei da pyntip ko wa yei pyrtuid yong ka da booh ha ka Facebook Acccount wa thok.
Kam kani ka jooh ka kaam da jia ha East Jaiñtia Hills katkam wa pyntip ki pulit heiwa ka wi ka kynthai da ujor ko pyrchah ya u chan ko uwa na chnong Wapungskur uwa da phah ya ka wow phah ya i Video wa khlem sap sula ko tangwa uni u chan ko uwa tip kam u Stopme Ryngkhlem won da saam u ya ini i Video cha ki lok u lyngba ka WhatsApp wei da maham u ka leh.
Discussion about this post