Ujor kawi ka manbei wa chah thaad i dur yong ka ha Facebook

Shillong: Kawi ka manbei na Byrnihat, Ri-Bhoi kawa tip pyrtuid kam ka Pdianghun Mawlong da ujor ko pyrchah yei chah thaad ki dur yong ka ha Facebook ha ki bru ki wym em de i sarom kiwa thmu du wow dai sarom ya ka.

Hawa yaklam wa kiwa pathai khubor ynne ka sngi, ka Pdianghun da ong ko wa da man kamwa yooh tdong pseiñ ha ka miet 9 tarik uni u bnai wa yoh yutip ko wa em i Video wa ki dur wa chim ki bru ha ka Facebook Account yong ka wei da pynbaad ki bru toh ka bru wa em ha i Video khlemakor.

Da ong ko mar ya tip ko ya ini da lai ujor ko ha ki pulit ha Umiam Police Station heipor 9:30 i miet, tangwa neidaw wa ym em sahep (Officer) da phah wan ya ka wow wan ha ka sngi wa bood.

Ka Pdianghun da ong ko wa da thooh yutip ko lyngba ka Facebook neiyi i daw wa chim Screen Shot ki bru yei dur yong ka wei da booh ki yei dur u kurim yong ka, u Badondor Tyngkan.

Related posts

Lai kjat ki waheh wa ki khynnah na Dkhiah West chadooh cha u mot u Kiang Nangbah

March 23, 2024

Pynphooh ka Loompyrdi Iongpiah ya ka sngi ki kynthai deiwa pdiang burom ya ka Ridamaya

March 8, 2024

Da ong ko wa ini i leh kini ki bru wa da yap i sarom da pynchrai i ya kiwa hayung hasem yong ka hanlada da tip ki wa ym toh ka.

Neiliang u kurim yong ka da kyrpaad joor u na ki pulit wow kreh chitom wow thooh ya ki bru wa emkti wow thaad madan ya ka manyung deiwa booh lang i dur yong ki deilang wa ini i Video wa khlem akor.

Da ong u wa kani ka Video toh kawa nadooh u snem 2017 wa da booh ha Youtube kawa yatoh wa ka khubor wa thaad ya uwa kitkaam uwa yahkhmat ka seiñ saiñ pyrthai uwa tip pyrtuid kam u Hardik Patel.

Katwa neiliang kawa yahkhmat ya ka TUR, ka Angela Rngad wa kawa yahkhmat ka CSWO, ka Agnes Kharshiing da beiñ joor ki ya ki bru kiwa nood wow thaad madan deiwa chna thok ya i dur yong kani ka manbei Khasi wei da dawa wa ka Cyber Crime ka tnat pulit toh u thooh ki ya ki bru wa pynpoor ya kini ki dur wa ka Video wa chna thok wow dai sarom ya ki kynthai ha Facebook wa ha WhatsApp.

Ka Angela da ong ko wa em ki wa da em ki Group kiwa jooh mlien wow thaad madan wow dai sarom ya ki kynthai ha ki Facebook.

Da ong ko leh wa da em ka aiñ Criminal (Amendment) Act 2013, kawa da khang wei wow pynchitom ya ki bru kiwa leh ya kam kini ki kaam.

Ka Agnes da ong ko wa da em ka kyndon ka Section 66 (e) ka IT Act 2000, kawa da klam che wow pynchitom ya kiwa emkti ha kini ki kaam.