Ynne ka sngi ki arngut chi payu da lai ujor ki ha Jowai Police Station ya ki bru wa wan bom wan dat ki hei thaw wa sahwai ki ha Mihmyntdu Mookymphad ynnin i miet hadien wa dep yania ki chi payu.
Neiliang ka E. Phawa wa u D. Phawa kiwa man chi payu khana ki wa em hi itæ i yañia ki para chi payu heipor kamwa 7:30 i miet, wei hadien wa yut uwi u payu ki kat dang ya chong parom ki em bru wot wa wan kyrsu yung soo ngut kiwa da khut ki cha lait wei da kylli ya ki ileh wa ya awri ki.
Da jubab ki wa da yañia hi-eh ki chi payu wei najrong wa paanmaap da kyrpaad ki leh yow yaklam sñiawthooh, tangwa kitæ ki bru wa wan won ym em de ap ki wei dat wot ki ki pyn heitæ hi ya u D. Phawa hadooh wada takha u wei wot yaka payu kynthai u wa uwi u payu arbei u leh kiwa da pyrchang pynkhlaad da chah khujai chah taan ki heitæ.
Chooh chooh khana ki wa da khut haroh ki wa ya ki toh ki palat chnong wei ym emkaam u chong u sah ki cheini, wei hei step won neiliang ka tre yung leh hadien wa yoh yutip ko da lai klam ko ya ki yow mih yung noh ki.
Hapyrdi i dooh buit neiliang kini ki chi payu da paan yarap ki naka seiñ All Hynñiewtrep People United Front (AHPUF) hajrong i chah thombor yong ki wei da lai ujor FIR ki ha Jowai Police Station.
Napyrdi ki 4 ngut wa wan thombor da tip pyrtuid ki du ya u Ohi Shylla uwa man Secretary dong ha Mookymphad wa u Kynmoo Phawa.
U Chandame Sungoh, Secretary AHPUF ong u wa hei sakhiat kam ki bor wa pait chnong lada em iwon iwon wa jia hapoh chnong toh u khut yaklam sñiawthooh ki ymtoh u wan bom wan dat khlem sñiawthooh.
La toh wot ya kiwa sah yungwai leh toh u khut chwa ki te bichaar chnong katkam ka luti ka aiñ, wei la toh i wym ye won ki toh u e kti cha ki bor ka aiñ.
Ong u leh wa hei sakhiat kam ka chnong toh u booh ko ki aiñ ki kyndon wa kam kiwa pait ya ki dong waphær waphær nadooh ki VDP yoh ki u bood neibynta i bha i miat wym yoh u thombor katwa ngait.
“Kam ki jait bru Pnar man i i jooh hi, man tre ri hi i hanla wan i naki chnong waphær waphær, la kiwa sahwai ha ki chnong sor næ palat sor wym toh u em i yoobeiñ yoo poh,” pynrap u C. Sungoh.
