Shillong: Le ngut ki kynthai kiwa da chah thaad wei chah daisarom ha Facebook kam ki kynthai dai doh, da ujor ki ha ki pulit ynne ka sngi pyrchah ya ki bru kiwa thaad ya ki.
Katkam wa pyntip u SP ka East Khasi Hills, u Davis NR Marak, da ong u wa kini ki kynthai da wan ujor ki wei ka aiñ daw leh ko yeiwa emkaam ya kiwa daisarom ya ki.
Katkam ka takit wa sdang, u SP da pyntip u wa ki Facebook Account yong kini ki bru da em wa chna tooh da kiwi tawon ki bru wei da booh leh da ki dur wa ki pyrtuid yong ki heiwa da pynemkaam bakla ya ki.
U SP da ong u wa ki pulit ki dang pynman ki ya i takit kawa bniah hajrong ini wei daw chemtre lyngba ka IP Address wow tip ya ki bru kiwa emkti ha kani ka kaam pyrchah aiñ wow daisarom ya kiwi.
Kam wow pynkynmoo wa ha kawi ka Facebook Account yong kawi ka bru da pynmih pyrtuid ya kiwa yahaap kurim ko wa kynthup nadooh ki khynnah skur, kiwa sikai, ki doctor wa ki montri sorkar.
Discussion about this post