Shillong: Ki Seiñbhalang hapoh West Khasi Hills District wa kynthup ya ka Hynniewtrep Youth Council (HYC), ka Hynniewtrep Achick National Movement (HANM) wa ka Western Youth Federation (WYF) ha kini ki tayaw da lai khang khyrdep ki ya ki dukan ha Iew Shallang wei da lai pait ki ya ki karkhana saiñ mooyong tooh kiwa em ha ka thaaiñ Shallang.
Ha ini i lai pait da chem wa em kamwa 10 tylli ki karkhana kamjooh i em ki baar jylla kiwa mylla ha kitai ki karkhana yeiwa ki seiñ da sñiawkhia ki yei man i long hapoh ka thaaiñ heiwa ynne ka sngi da lai yachem ki ya u Chief Executive Member (CEM) ka KHADC u Teinwell Dkhar kamjooh ya u Executive Member ka I/c Labour Department u Teibor Pathaw wa u Executive Member ka I/c Trading Licence u Paul Lyngdoh ryngkat wa ka dorkhat.
Ha ka dorkhat ki seiñ da sñiawkhia ki wa kammon ha ka thaaiñ wa ka Hima da e NOC ya kini ki karkhana saiñ mooyong khlem bichaar bniah chwa wow e NOC neibhah katkam wa chem ya kini ki NOC da e cha ki wymtoh ki tre kini ki karkhana wei kini ki karkhana ktah ki leh ya i chait i khiah kiwa chong chnong.
Ki seiñ da ong ki wa em 10 tylli ki karkhana tangwa ka KHADC ymtip ko yeini iwa rap diaw toh wa yoh chong chnong ki baar jylla ha kini ki karkhana wei khih mylla ki katkam ka Aiñ yong ka Hima Nongstoin ka ” The Administration of Nongstoin Syiemship Rules 2006” kawa ong ha ka No 8 (iii) bynta (a) A dkhar shall have no right to Settle or Cultivate in any part or Village within Syiemship iwa mut u dkhar ymye u wow chong chnong næ khih mylla hapoh ka Hima Nongstoin katwa hei sakhiat ini waroh man i dei lyngkdang.
Neiliang yong u CEM da ong u wa daw chimkhia u yeini katwa neiliang u EM ka I/c Labour Department da kular u wow phah sangeh chwa wow e ya ki Labour Licence katni khamtam ha ki bynta ka Shallang katwa U EM I/c Trading Licence da ong u wa heiyatoh wa i chong dukan ki baar jylla daw leh ka Council yeiwa emkaam.
Discussion about this post