Ujor ki pulit ya ka Facebook Page wa booh ya ka video wa thang ya ka lama India

Shillong: Hadien wa poor kawi ka Video ha Facebook kawa pynyoo wa da thang ya ka lama ka ri India da ki bru wym tipmit, neiliang ki pulit ka East Khasi Hills District da ujor ki da ka ‘Suo Moto Case’ pyrchah ya ka Facebook Page kawa da booh ya kani ka Video.

Hawa yaklam wa ka Superintendent of Police (SP) ka East Khasi Hills, ka Claudia Lyngwa da ong ko wa ki pulit da chimkhia ki yeini wow chem ya ki bru wa emkti ha ini i kaam deiwa ujor leh da ka “Suo Moto Case” ha Sadar Police Station Shillong, wei i takit dang lai i chakhmat.

Ha kani ka Facebook Page kawa da kam wa toh na Shillong da em leh ki kyntien wa thoh wa ong wa kam ka dak i pyrchah joor ya i leh embor ka India, ki khon ka jaitbru Ynñiawtrep da thang ki ya ka lama ka ri India wei wow dawa pynkrehkaam noh ya ka ILP ha ka jylla Meghalaya.

Hawa kut ka Video da ong wa ka ri Ynñiawtrep ymtoh ka ri ki broo wow noh jhep ya kiwa poiwiar wei ki wow synchaar ya ka pateiñ wow wan, tangwa i toh ki kynraad wow pait wei synchaar hi ya ka ri ka muluk wei da man ki kiwa da pynkhreh.