February 27, 2020

Da ka tamasa wa 9 sngi wow pynpawnaam ya ka juk Meghalaya

Advertisement ad1

Shillong: Ka sorkar jylla lyngba ka chnat uiñke suwari daw pynman ko ya ka tamasa kawa da e pyrtuid katkam ka juk ka Meghalaya namo ka Meghalayan Age kawa khynde sngi nadooh ka 7-15 tarik Wisu.

Ya kani ka tamasa daw pynman ha Thadlaskein, West Jaiñtia Hills wei i pynkhreh ya ka da yoh da ka E-Factor Entertainment Private Limited kawa em yung krehkaam ha New Delhi, wei ka sorkar daw pynlut ko T. 4.3 klur.

Hawa klam wa kiwa pathai khubor, u montri rangbah ka jylla u Conrad K Sangma uwa pait leh ya ka chnat, da ong u wa ka Meghalaya man ko kawa pawnaam bha neibhah wa em ko ki krem ha kylleiñ ka jylla tangwa ha kini ki snem wa da dep, ym em u leh iwon iwon hajrong ini i bynta i wow myntoi ki paidbah wa ka jylla.

Ka sorkar jylla da rai ko wow pynman ya kani ka tamasa hadien wa dang chem wot ki stat wa tih bniah, ya ki moo rim kiwa da rim bha i rta yongki la kamwa 3000 snem wei da e pyrtuid ya kani ka juk kawa hadooh katni kam ka Meghalayan Age.

Ha ka sngi pynkut, u montri rangbah da ong u wa dang yaklam wow emlang u montri ka DoNER u Dr. Jitendra Singh, u montri kaam uiñke suwari u Prahlad Singh Patel, u montri ka chnat yalehke, u Kiren Rijiju, wa kiwi kiwi.

Heiyatoh wa i pynneh ya ki krem khamtam wow yada ya ki nei tih mar poh-khyndaw, u Conrad da ong u wa dang pynkhreh wow chna ya ka Cave Protection Board ka wow kreh wow yada ya ki krem.

Heijooh i por u Conrad da ong u wa da bood ya ki kyndon wa da booh da ka sorkar pyrdi heiwa ym chah ya ki bru kiwa wan na ki thaw wa chah ktah ha u khñiang COVID-19 wow wan ki cha kani ka tamasa.

Ha kani ka sngi, u Conrad da pynlait u leh ya ka kot lakdop Meghalaya Age, hei emlang u Commissioner & Secretary ka chnat, u Dr. Vijay Kumar, wa u Director yong ka u Ceryl V Diengdoh.