15 49.0138 8.38624 1 1 4000 1 https://wyrta.com 300 0
Advertisement ad1

Ujor kiwa chong chnong ka Lad Rymbai pyrchah ya ka Coke Factory

0 Comments

Jowai: Ki soo ngut kiwa chong chnong ka Lad Rymbai wa kynthup ya u Philip J. Bamon, u Arky Pajuh, u Chiborlang Suchiang wa u Micky Shylla da ujor ki haka 12 tarik uni u bnai ha u DC ka East Jaiñtia Hills District pyrchah ya ka karkhana Coke Factory wa em ha Mookhep, Lad-Jayiah yei ma wa wanrah ko ya ki paidbah.

Ha ka ujor da ong wa kani ka karkhana pynmih ko ya ka la-ær wa man bih khlem pynemkaam ya kiwon kiwon ki tiar wow pynkhooid ya ka iwa da ktah leh ya ka khyndaw wa ya ka um, wei kani ka la-ær bih da ktah ko leh ya kiwa chong chnong Lad-Rymbai, Pamra, Wapung, Jalyiah, Moolamanoh wa Iongkaluh.

Da ong leh wa kani ka karkhana em ko mar pyrchah ya ka Good Shepherd Secondary School, Lad Rymbai kawa jngai du kamwa 130-150 donhi na kani ka karkhana heiwa kani ka skur em ko hadooh 700 ngut ki khynnah wa puræ ha ka wa 25 ngut ki wakreh kiwa da chah ktah nei pynmih tdem kani ka karkhana.

Kamtæ i tdem na kani ka karkhana daw ktah joor ko khamtam ya kini ki khynnah skur heiwa da em ki manbei manpa da phah pyndam skur ki ya ki khon yong ki neidaw wa em katai ka karkhana iwa da pyn sepia ya i thong wow pyndooh noh yei sahdien wei manda chong yung ki khynnah boon ki por poi ki cha ki luti wa bakla.

Da ong chooh chooh wa kat wym pyndam noh ya katai ka karkhana daw ktah ko ya ka mynried ki khynnah kamjooh ya ka imlang sahlang wei toh u khang noh ya katai ka karkhana lane kyrriah thaw noh ka chawi.

Ya kani ka ujor da phah leh cha ki montri ka sorkar wa kynthup ya u Lahkmen Rymbui, u Sniawbhalang Dhar, u Kyrmen Shylla wa cha u AL Hek.

Advertisement ad1

0 Comments

Leave a Reply