U Montri Rangbah ka jylla, u Conrad K. Sangma, ynne da lai pdiang u ya u Genal R. Marak, u khynroo na Meghalaya uwa da yoh u liwan yung hadien wa da hap maad yei chah lehbeiñ yoobeiñ ha Jammu and Kashmir.
U Genial dapoi u ynne ha Guwahati Airport wei da ye wow pynlait oo hadien wa paan yarap u lyngba ka 1971 CM Helpline (CM CONNECT).
U Genal toh uwa da chah khang laad wow lai kynjoh ktien wa kiwa emyatoh u la le snem wei ha kini ki por da mut kiwa ha-yung ha-sem wa da yap noh u.
U Genal R. Marak toh u khon u Rimel J. Sangma wa ka Surubi R. Marak, uwa chong chnong ka Lummuri, Ichamati ka East Khasi Hills, wei da kreh u ha kawi ka Restaurant ha Jammu & Kashmir la 3 snem deiwa chah chim kabu wei chah pynchitom bha.
Le snem nachwa heipor wa em u 16 snem i rta, u Genal da lai u cha Shillong yow thooh kreh wei da yatoh lok u wa uwi u bru uwa da lai yah oo cha Kashmir yow thooh kreh. Hadien won da yoh kreh u ha kawi ka Restaurant ha Srinagar deiwa yarap kiwa chong chnong.
Tangwa ha ini i por wa kreh u, ym em su nong sngi ya oo wei da chah dat wei chah pyndik u ha u tre Restaurant deilang wa u khon u.
I yoh u liwan yung u Genal da sdang i ha ka 24 tarik u April 2026 deiwa yoh u wow Phone cha u 1971 CM CONNECT Helpline heiwa da khana u yeiwa jia ya oo hadooh wa da mut u wow pynkut noh yei mynsien u.
Kamtæ neiliang ka sorkar Meghalaya deiwa ya krehlang wa ka sorkar Jammu & Kashmir da ye ki wow lai pynlait ya u Genal du hapoh kattu katni kynta wa yoh Phone na oo deiwa lai u Assistant Labour Commissioner wa ka Anti-Human Trafficking Unit ka Jammu and Kashmir deiwa chem ya u Genal na Srinagar.
Ka sorkar Meghalaya da thung ko ya uwi u Magistrate, u Sanjay D. Shira yow yarap ya ka Surobi R. Marak (ka bei u Genal) wa kiwa emyatoh u yow pyntikna wa pynpoi oo cha yung dei suk dei saaiñ.
Da pyntip leh wa da pynlait ya waroh ka bai nong sngi u kawa da sah khlem su.
Discussion about this post