Jowai : U ma Tariangmon Lamat toh uwa sumaar bru namo uwa khem ya ki chyieñ wa da kheiñ uwa da pawnaam bha ha ka thaiñ Amlarem kamjooh ha kylleiñ ki ri-loom Jaiñtia wa Khasi.
Yei thaw khem yong oo da em ha ka chnong Mawlong iwa em ha rood ka sarok wow lai cha Padu iwa jngai kamwa 5 Km na Amlarem Sub-Division.
U ma Tariangmon da em u ya i thaw sumaar wa kyrpang ya kiwa chah sumaar ha oo. Da chna u le tylli ki yung trep kiwa da bynta u hadooh 11 kamra wei da kær ya ki da ki siej wa ki dieñ katwa ya i tnoom da tymmoh da ka tin.
Ha kini ki kamra kiwa chah sumaar ha oo, ye ki leh u sah kamjooh wa kiwa ha yung ha sem yong ki yow pynbiang baam ki ya kiwa chitom wei u ma Tariangmon ym em chim bai wai u han lada sah ki boon bnai leh.
U ma Tariangmon ong u wa waroh kiwa wan chah sumaar ha oo nadooh kiwa kheiñ kti, kjat wa kiwi kiwi ki bynta da yoh bait ki ya i chait i khiah lait noh kiwa chitom joor kiwa chim por wow sumaar ya ki.
Kiwa chitom da wan ki na kylleiñ kylleiñ kam na Dawki, Pyrdi Wah, Khanduli, Mukroh, Umladkhur, Thangbuli, Namdong wa kiwi kiwi wei da ong ki da sñiaw kam chi yung chi sem ha kani ka thaw sumaar.
U wa sumaar ong u da pyllut u na kata yong oo yow chna ya kani ka thaw sumaar wei da thooh yarap poisa u na kiwa boon ki thaw tangwa ym em wa yarap poisa ya oo. Da ong u leh kiwa wan sumaar ha oo toh kiwa wan na ki yung wa dooh wa duk hadooh wa ki dieñ chdooh toh kiwa tah u da oo hi na ki dieñ neibhah wym dap poisa u thied da kiwa sa-ad.
Kiwa wan chah sumaar toh kiwa da mynsoo iwa oor ki krem mooyong, kiwa lehke football, cricket, ki accident wa kiwi ki jia mynsoo. U ma Tariangmon toh uwa sumaar ym du ya ki chyieñ kamjooh leh e dawai kynbat u leh.
Da ong u leh wa haap lai jngai bha u yow yoh ya ki dawai kynbat neibhah katni da joor wa syllen ki loom ki wa wah nei pam dieñ ki bru iwa cha palat wei tieñ u leh wa kini ki dawai daw wiar jait ki lada kamni u pteiñ ki bru.
Discussion about this post