January 16, 2017

Nadooh na Psiar wan kiwa pyrchah yei chah kyrriah kaam u Arunkumar
Maham chah thngan ki paidbah lada chah kyrriah u Arunkumar kam u DC

by Wyrta Staff

0 Comments

Advertisement ad1

Jowai : I yakhih wow pynneh ya u Arunkumar Kembhavi kam u DC ka West Jaiñtia Hills District dang joor i heiwa ynne da pynman da ka sit-in demonstration næ wow chong yonglang wow pynyoo yei pyrchah yeini i leh ka sorkar.

Ya kani ka yakhih da yahkhmat da ka seiñ Meghalaya Peoples United Front (MPUF), wei da wan kyrchaan leh da ka seiñ All Jaintia Hynniewtrep People United Front (AHPUF).

Advertisement ad1

Advertisement ad1

Da wan yachimbynta leh da ki paidbah wa wan na ka chnong Psiar kawa em ha khappood ka jylla Assam, na Nongkynrih, wa kiwi kiwi.

U president ka MPUF u Dapoiwanmi Laloo hei yaklam wa kiwa e khubor, da ong u wa ka seiñ ym chong klikti ko hadooh wa pyndam ya ka hukum kyrriah kaam ya u Arunkumar.

Da ong u leh wa ki bru boon kiwa pyrchah wei kiwa rmaan hadien wa mih ka khubor wow kyrriah kaam ya oo, tangwa manda poi wow leh yei kaam, da wiar pathan ki.

U waheh chnong ka chnong Psiar, u ma Menita Synnah, da ong u wa emkaam u neh uni u DC neibhah du oo wa ye u wanrah yei kylla hapoh ka District neibhah lada kyruiñ cha ka yingkieñ Kureliya, dei doh wan u wow sylli yei kreh ha kani ka thaw khlem em iwon iwon i chah pynthut ha ki pulit ka jylla Assam.

Ka dkhot yong ka seiñmanbei na Nongkynrih ka kong Poikyrdan Suchiang, da ong ko i daw wa wan ki manbei cheini toh na ki kaam wa boon wa sakhi ki wa leh u Arunkumar kam u DC khamtam wow pynkreh chaaid chaaid ya ka scheme chispah sngi næ ka MGNREGA.

U Dapoiwanmi Laloo da pyntip u wa kani ka yakhih u leh ya ka le sngi nadooh 11 waje hadooh 3 waje i sngi, wei lada ym ap ka sorkar daw pynman noh chei chah thngan wa khlem booh por.