U SP ka Ri-Bhoi District da pyntip u wa uwi na ki dkhot ka HNYM uwa tip kam u Ricky Tangsang deilang wa ki lok u toh kiwa da em 6 tylli ki Case pyrchah ya oo kiwa kynthup ya 4 tylli ha Nongpoh PS kiwa ar tylli ha u snem 2024, kawi ha u snem 2025 wa kawi won ha u snem 2018, kawi ha Umiam PS ha u snem 2024 wa kawi ha Laban PS ha u snem 2024 wa chah pynbaad ki wa leh ki ya ki kaam tooh wei dawa poisa.
Da pyntip u wa heiyatoh wa iwa dang kem ya ki 5 ngut ki dkhot kani ka seiñ wa kynthup leh ya u Ricky Tangsang, u Sparly Syngkli, u Donboklang Kharbani, u Aiborlang Marbaniang wa u Krius Pariong kiwa waroh na Nongpoh, da leh hadien wa yoh FIR ha ka 19 tarik uni u bnai wa ha ki bynta ka Umdihar-Nongpoh-Umsning yong u sarok NH-6, kiwa kamai kari Tourist da jooh chah pynsangeh ki ha u Sparly Syngkli hei miet heiwa da chah dawa poisa ki nadooh Rs. 3000 hadooh Rs. 6500 neidaw wa kit bru ki da ki baar jylla wa kynthup ya kiwa uiñke suwari kiwa lai cha kiwa boon ki bynta ka jylla Meghalaya.
U SP da ong u wa kini ki bru wa kit ki kari kamai toh kiwa biang ki kot ki sla wei dadep leh wow pait wow sylli ki da ka Anti-Infiltration Check Post, Byrnihat. Wei najrong wa dawa poisa da pyndik ki hadooh wow tba kti ya kiwa kamai kari kamjooh ki bru wa em hapoh kari. Ini da wanrah ko leh yei dooh nong ya kiwa kamai kamjooh da ktah ko leh yei pyrkhat pyrdaiñ ki.
Kamtæ ki pulit ka Nongpoh da Resister Case ki hapoh ki kyndon 61(2)/126(2)/308(4)/310(2)/351(2)3(5) ka BNS wei hei takit da chem ya kiwa boon ki sabut nadooh ki dur, ki Video wa pynsakhiat yeiwa jia wa i phah poisa da kiwa kamai kari cha kini ki dkhot ka HNYM lyngba ka Bank Account.
Discussion about this post