Ka Meghalaya da jop ko da 164 Run ya ka Sikkim ha ka yalehke wa nyngkong yong ki ha ka Vijay Hazare Trophy wa pynman ha Jaipur ynne ka sngi.
U Guest Professional ka Meghalaya, u Chirag Khurana da yoh u 100 Run kam uwa sdang nakhmat katwa u Lerry Sangma da yoh u 69 na 63 bol yow pynyoh ya ka Meghalaya da 265/5 na ki 50 Over hadien wa rem ya ka kylla khlem wei da phah Bat nyngkong ya ka. Na kiwa kawang bol, u Dippu Sangma (3/13) wa u Akash Kumar Chaudhary (3/18) da lehbha ki yow pynhaap ka ka Sikkim da 101 All Out.
U Khurana da wai u yei Bat deilang wa u Kishan Lyngdoh. Wei kini ki arngut toh kiwa da lehbha ya ka Meghalaya ha Syed Mushtaq Ali Trophy T20 Tournament heiwa ha kani ka kynti da yoh ki wow kamai lang 48 Run neibynta ka Wicket wa nyngkong.
U Lyngdoh da haap u hadien wa kamai 15 Run heiwa u Rohit Shah wa u Guest Professional Punit Bisht da yoh ki 10 wa 20 Run. Ha ini i bynta ka Meghalaya da yoh ko 132/3 na ki 30.3 Over.
Hadien wa wan u Lerry da pynku leh yei kamai ka Meghalaya deiwa dat u 3 tylli ki 6 Run wa 3 tylli ki 4 Run yow yoh 69 na 63 bol. Deilang wa u Khurana da kamai ki 67 Run neibynta ka Wicket wa 4. Hadien wa haap u Khurana, da wan u Ravi Teja uwa da kamai 25 na 19 bol heiwa ka Meghalaya da yoh ko 9 Run chi Over ha ki 8 Over wa sah yow yoh 265/5.
Hawa Bat ka Sikkim, u Dippu da yoh u ar Wicket ha ka Over wa 5 katwa u Chaudhary da yoh u leh ar tylli ha ka Over wa 11 yow pynman ya ka Sikkim wow yoh ko 39/4. U Dippu da yoh u ya ka Wicket wa 3 ha ka Over wa 14 iwa da bood sa u Chaudhary iwa da pynpoi ya ka Sikkim 45/6.
Ka Sikkim da ye ko wow rap neh slem deiwa kamai 35 Run neibynta ka Wicket wa 7 tangwa ym em neh slem hadien wa ka Sikkim da yoh ko 101 Run deiwa dooh lut ki Wicket, u Teja (2/3) wa u Aryan Bora (1/15) toh kiwi kiwa da yoh Wicket.
Ka Meghalaya kattu daw yachem ko waka Bihar ha ka 9 tarik.
