Wa boon kiwa em HIV ha WJH pynman ka MCSWA yei pynsñiawthooh ha District Prison

Ynne ka sngi ka Mihmyntdu Community Social Welfare Association (MCSWA) da pynman ko ya ka Sensitisation Workshop on HIV/AIDS namo i pynsñiawthooh hajrong u khñiang kjut HIV/AIDS neibynta kiwa kreh wa ki pulit ka District Prison and Correctional Services, West Jaiñtia Hills heiwa da emlang u U. Kyndiah, Superintendent wa u Batskhem Nongbri uwa man u DSP ha kani ka thaw. 

Ka Dr. J.N. Chullai, ka Director ka MCSWA da batai ko hajrong u khñiang kjut HIV/AIDS heiwa kammon ktah u ya i doh i pran wei khamtam ya i thij i pyrkhat ki bru wa em ya uni u khñiang kjut. 

Da ong ko wa i yoobeiñ ya ki bru wa em ya u khñiang kjut HIV wanrah i ya ki wow artatien ki wow wan ki chaphrang wow lai thooh dawai wei ini daw daw ktah pathan i ki dei wym poi pyrkhat, deiwa kyntu ya ki paidbah wa ymhoi u yoobeiñ ya ki neibhah wa ki leh toh ki bru kam kiwi wei emkaam wow man salonsar i jooh. 

Chooh chooh da batai ko kammon poor uni u khñiang kjut nadooh i pynemkaam ya u jooh u thyrnia hawa dung drugs, wow yahap kurim khlem pynemkaam yada wa kiwi kiwi. 

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Ha kani ka sngi da yoh i klam na ka R. Suchiang, President ka Jaiñtia Network for Positive People (JNPP) da khana ko ya ki kaam wa leh ka seiñ wow yada yei hok yong ki bru wa em ya uni u khñiang kjut wei kammon da pynman ka seiñ ya ki pynsñiawthooh paidbah hajrong kani ka kjut. 

Da pynche ko leh hajrong kammon i dawai yarap i wow pynkhlan ya i doh i pran ki bru wei kamjooh leh kammon yada ya i khonboo na uni u khñiang kjut heipor wa dang pun ha kpoh. 

U Malsom, uwa man u Secretary ka JNPP da batai u hajrong i ktah hawa pynemkaam bakla ya i drugs heiwa kammon nei pyrchang poi chei kyrni wow pynemkaam ya i drugs. 

Ha kani ka sngi ka Sunita Suna da batai ko hajrong ki kyndon ka aiñ HIV and AIDS (Prevention and Control) Act, 2017 heiwa da khana ko wa katkam ki kyndon kani ka aiñ da khang pyrchah wow yoobeiñ wei wow lehbeiñ ya ki bru wa em ya uni u khñiang kjut. 

Da pyntip ko wa ka West Jaiñtia Hills toh kawa boon dooh kiwa em ya u khñiang kjut HIV/AIDS kamtæ da kyntu ko ya ki paidbah wa ymtoh u yoobeiñ wow lehbeiñ ya ki neibhah wa emkaam ki yei e mynsien wei wow kyrchaan ya ki. 

Kani ka pynsñiawthooh ynne ka sngi leh man ko kawa nyngkong dooh kam kani wa da pynman ha kani ka thaw. 

Ka Yooika Bareh da e ko ya ki kyntien pdiang burom wei da yoh ya ki kyntien khublei na ka Thywill Dkhar.