U Symbood Montri Rangbah ka jylla uwa pait ya ki Kaam Pohyung (Pulit), u Prestone Tynsong da khana u wa dadep wow phah ya u Superintendent of Police ka East Khasi Hills wa kamjooh ya u SP (City) wow pyntikna wa em i chngaaiñ ya kiwa chong chnong wei wow yada na ki kaam tooh kam thiem kiwa da joor bha katni khamtam ha nongbah Shillong.
Hawa kylli ya ki laad wa ka sorkar da chim wow khanglaad ya kam ini i jia kiwa ktah ya kiwa chong chnong, u Prestone da ong u wa da phah ya waroh ar ngut ki SP wow pynkhlan ya ki bor pulit ha waroh ki dong wa ki chnong kiwa em ha nongbah Shillong.
Da ong u wa ini i jia mih ki neidaw wa boon palat ki bru kiwa dih drugs ki wym salia de ya iwon iwon i por wow leh ya ki kaam tooh. Da ong u leh wa hajrong ini, ka sorkar da phah ko wow pynkhlan chooh chooh ya ki bor pulit khamtam ha ini i por wa da sdang ka aiom wa ki bru lehkmen ki.
Kam wow kdaw heini wa ha kini ki kajiak bnai wa dadep, ka nongbah Shillong da sakhi ko ya ki kaam tooh kiwa da nood wow pynpiah ya ki kari wa kamjooh wow psiah ha yung bru wot ha ki yungmane wow tooh wow khynra naphang ya iwa em.
Ini waroh da wanrah ko syier ya kiwa chong chnong wym chngaaiñ de i lai i wan neidaw wym swe de kini kiwa tooh la dei miet næ dei sngi.
Hawa pyrchang wow lai kylli na ki heh pulit ka East Khasi Hills District hajrong ki ujor wa ki takit ya kini ki kaam tooh kiwa da pynchong syier ya ki paidbah, da kyntait ki wow khana iyi iyi ya ki kaam tooh wa da pteiñ hadooh kini ki sngi.
Discussion about this post