Heiyatoh wa iwa jia ynnin i miet ka 25 tarik, neiliang ki BSF Meghalaya da pyntip ki wa ki chipai ka 4Bn ka BSF kiwa yang ha Standing Patrol Base wa em Umsyiemrim da yoo ki wa em ki bru wa lai lyngba u sarok Dawki-Pynursla wa em hajan u pood waka Bangladesh, kamtæ da lai ki wut-wut cha kani ka thaw tangwa kini ki bru mar ya yoo ki ya ki BSF yut ki deiwa noh leh ya ki mar wa kit ki ha khlieh ki.
Hawa thooh ya ki mar wa noh kini ki bru, da chem ya ki Saree wa chongdor T. 50,000.
Ha kani ka jooh ka sngi, ki BSF da yoh ki leh wow kem ya kiwa khayi tooh ya ki sula kiwa chongdor T. 2,21,000 na kani ka jooh ka thaw.
Hadien ini da em ki bru wa yalang hajan kani ka thaw yang namo ka BSF Post wei da kawang moo ki deilang wa ki klong Beer ha ki BSF wa em ha kani ka thaw. Neiliang u Post Commander da pyrchang u wow pyn jai-jai tangwa ki bru da pteiñ ki wow kawang moo kawang klong.
Ha ini i jia da mynsoo ar ngut ki chipai BSF, kamtæ yow yada ya idæ yow lait chooh u em ki chipai wa mynsoo, ki BSF da siat ki soo kuli cha suiñ. Da pyntip leh cha ki pulit ka Pynursla kiwa da wan cha kani ka thaw yow pyn jai-jai ya ki paidbah wei da pyntip leh wa wym em wa mynsoo ha ini wa siat ki BSF.
Neiliang u PRO ka BSF Meghalaya da pyntip u wa ha ka 5 tarik uni u bnai da em kam ini i jooh wa jia ha kani ka jooh ka thaw hadien wa yoh ki BSF wow kem ya ki that ki nep wa chongdor T. 1 lak heiwa da em kiwa wan kawang moo ya ki BSF hadooh wa mynsoo uwi u chipai BSF hei bynta i khlieh.
Chooh chooh da ong wa ini i thaaiñ Umsiem toh iwa khlan bha u pynemkaam da kiwa khayi tooh nadooh ki masi, ki that, ki dawai biah khmat wa kiwi de ki mar lyngba kani ka thaw yow psiah cha Bangladesh wei em boon bha ki bru kiwa da ya krehlang yow khayi tooh wei kiwa pyrchang leh yow pynthut yei suk i saaiñ yow myntoi samen ki.
Puræ leh: Siat ki chipai ka BSF ha Lad Umsyiem, mih i kulmar wei mynsoo ki paidbah
