Kawi ka manbei wa tip pyrtuid kam ka Pancyline Ryngki kawa chnong wa sah ha Mowkaiaw wei i chnong tre ko toh na Chiliang Myntang, West Jaiñtia Hills District, ha ka 3 tarik uni u bnai da lai ujor FIR ko ha Barato Police Outpost pyrchah ya u Eilad Talang wa u Sambha Bareh deilang ki bru yong ki hajrong i emkti ki wow lai leh pynsih wei pam ya ki dieñ wa em ha i kpær ko wa pyrtuid “Kper Sata” iwa em ha ka chnong Chiliang Myntang.
Ka Pancyline Ryngki da ong ko wa ini i wan leh dusmon kini bru ya kani ka kpær ko da man i dooh nong wa khroo wei man leh i thombor yei hok yong ka wa da yoh pateiñ ko na ka bei yong ka, ka Bashinglam Ryngki nadooh u snem 2008.
Heipor wa dang pam dusmon kini ki bru, ki tre kpær wa em ha katai ka thaw da kyrpaad ki wow dam u pam ya ki deiñ, tangwa da chah maham kylla ki ymtoh u jan ki ya yap pathan.
Ki tre kpær da pynsñiaw ki leh i diaw yeiwa jia kamni neibhah la ar pateiñ kattu wa pynemkaam ki ya kani ka kpær wei ym jooh em jia iwon iwon.
Discussion about this post