U Symbood Montri Rangbah ka jylla, u Prestone Tynsong da ong u wa u President ka Meghalaya Pradesh Congress Committee (MPCC) u Vincent H Pala dang leh u kam u khynnah khian wow pynbaad leh ha i klam yong oo kam uwa dang khynnah bha.
“U Pala da klam khynnah u cha wa palat ya iwa rai yong ka sorkar Meghalaya Democratic Alliance (MDA) wow soi soskular pynbait ya u pood u ang wa toh du yei myntoi samen yong ki kattu katni iwa da yoo lakam wa thooh daw yong samen wei da man bait ko du ya ka yung yong ki Dhar,” da ong u Prestone.
U Prestone da kylli u leh wa ileh wa u Pala da klam bait u thij yei bynta yong ka Khanapara, ileh wym klam u ya kiwi ki thaw kam ka Maikhuli, Pilangkata lane cha West Khasi Hills wa kiyi kitæ kiwa yoh nong wei kiyi kitæ lowa dooh nong na kani ka pynbait pud.
“Ham leh khynnah, neibhah ini i rukom pynbaad pynyoo ko wa u Pala kopsar em u i eh yong samen (Personal Problem) wa ka yung yong ki Dhar, da yoo lakam wa ki Dhar da rap mahajon ki bar ya oo,” da ong u Prestone.
Da ong u wa hei yong sakhiat wa u Pala wa ki Dhar toh ki bru kiwa mahajon napoh ka jylla, ki toh u ya krehlang ki tangwa i klam yong u Pala da man kam u khynnah wei da man u leh thij kam u khynnah wa ileh hap u wow pait wei thooh daw bait du ya kawi ka manyung.
Hei yong sakhiat, u Pala kam u MP wei leh u President ka MPCC ym toh u klam u kam kini ki kyntien neibah wym yahaap wow pynbaad hi-eh wei wow thooh daw bait thij da ya ka manyung ki Dhar, da ong u Prestone.
Puræ leh: Wa jhan i pynbait pood toh wow yohnong ki heh spah wa thied ya ka Hotel ha Khanapara: Vincent
