theme-sticky-logo-alt
theme-logo-alt
Advertisement ad1

Wa em kam u Rowell te ym yoh ILP: KSU

Ka KSU South West Khasi Hills District da beiñ joor ko yei klam khlem da pyrkhat yong u Rowell Lyngdoh uwa jooh man kam u Deputy CM warim hajrong ka Inner Line Permit kamwa da mih lyngba ki laad pathai khubor ha kini ki sngi wa da lai. Ka seiñ da ong ko wa ini leh man ko i klam pyrchah ya ka jaitbru wei iwa pynjemdaw ya ka jaitbru kawa dang yang wow yoh ya ki aiñ kiwa khlan kam ka ILP wow yada ya ka ri wa ka jaitbru nei wan psiah pyrchah ya ka aiñ wei khlem ki kot ki sla kiwa biang haka jylla yong i.

Ka seiñ da ong ko leh wa deiwa em kam kini ki bru te ym yoh ILP, boi ym ye wow tip wa hapoh ka sorkar katni leh em kam kini kiwa pyrchah ILP kiwa lai napoh khnang wa ka sorkar pyrdi ym e ko ya ka ILP hapoh ka jylla.

Chooh chooh da ong wa i klam u Rowell wa ka ILP toh i bichni bru pynyoo ko yei tbian pyrkhat yong oo kam u bru rangbah wa u bru saiñpyrthai. Heiwa hei yong sakhiat toh i hok yong ki khian paaid wa ki jaitbru ri-loom wow yada katkam ka riti synchaar paidbah (Constitution) yong ka ri India.

Da kdaw wa ka pyrthai leh ka tipmit ko wa ki khianpaaid næ ki jaitbru ri-loom ki emkaam ki wow yoh ya ki aiñ wow yada ya ki kamwa da prooid dak ha ka United Nations Declaration on the Rights of the Indigenous People. Lada kyruiñ cha ka Art. 19(5) yong ka ri India leh da chem wa ka Constitution yong ka ri India ym em khang ko wow pynkrehkaam ya ki aiñ wa da em chwa lane wow chna ya ki aiñ pynrkhiñ yei psiah yei mih næ hawa yatoh wow wan chong wan sah yong ki bym toh ki jaitbru ri-loom ha ki thaw yong ki ri-loom (Scheduled Tribe).

Ka seiñ da ong ko wa ini pynyoo ko wa u Rowell da klam hi-eh u wei klam u kam u khynnah wei i ong yong oo wa ka ILP man ko kamwa ya bichni para bru da pynyoo ko yei bichni yong oo hi ym toh yong ki paidbah wa dawa ILP neibhah wa kani ka aiñ toh kawa katkam ka riti synchaar wei toh leh ka aiñ kawa da pynkrehkaam ha kiwa boon ki jylla yong ka thaaiñ Northeast ka ri. Wei ki paidbah da dawa ki ya ka ILP katni da ki phaw snem wei ym em da dawa wow bichni ya uwon uwon tangwa wow yada ya idæ wa ka jaitbru na ki bru wa na baar wow wan psiah khlem ki kot ki sla kiwa biang næ wow yoh man tre chnong ha ri yong i wei i dawa toh ya ka aiñ kawa da tipmit da ka Constitution yong ka ri India ym toh i paan wow man ka jylla wa laitlooid næ wow e da ka yong i hi ka lama wa ka Constitution.

Kanti da che wa i em kiwa mihkhmat kam u Rowell Lyngdoh ha ki por wa da lai da man sakhiat i khanglaad ya ka jaitbru wow yoh ya ki aiñ wow yada kam ka ILP.

Hawa khaddooh, ka seiñ da kwah ko wow kylli yaka NPP Mawkyrwat Constituency wa NPP South West Khasi Hills District, iyi u ong ki hajrong ini i klam yong u Rowell wa lada ki daw pyrchah ILP lang ki kamwa da klam u?

Ka kyrwoh na u Forwardman Nongrem, President, KSU South West Khasi Hills District.

Share this:
Previous

Du 5,784 ngut kiwa dang yoh ha India iwa duna dooh hadien 571 sngi

Next

Hiar kiwa dang chah ktah hapoh 200 ngut ha Meghalaya