U Montri Rangbah ka jylla, u Conrad Sangma, ynne hawa pynche hapoh ka yung dorbar, da ong u wym em iwon iwon i thmu wow lai palat ya ka aiñ Meghalaya Land Transfer Act, wot da ka Meghalaya Investment Promotion Agency leh neibhah kani ka aiñ toh kawa yada ya ki jaitbru yong i.
Ya kani ka phang yaklam da wanrah da u Heaving Stone Kharpran, MLA wei da chimbynta leh da kiwi ki MLA hajrong i thmu ka sorkar wow pynkylla ya ka thaw wa man khloo kam ka thaw booh da ki karkhana namo ka Industrial Estate.
U Conrad hawa pynche da ong u leh wa kawon kawon ka Agency ym ye ko wow lai lait ya ka aiñ wa da mynjur da chna da ka yung dorbar ka jylla.
Da pynche u leh wa kani ka thaw wa em ha Bynrihat toh kawa da sah chrah ymtoh kawa man khloo katkam ka Record wa em waka sorkar wei i thmu toh wow pynchlur yow wanrah ki karkhana.
Da e nongmuna u leh ya ka Northeast United kawa daw booh ko ya ka Residential Football Academy ha Shillong, wei hawa wan kam kini emkaam wow pynsuk ya ki wow leh ki yeini waroh neibhah ka Single Widow Agency boi ym ye ko wow leh yeini kamtæ da wanrah da ka Meghalaya Investment Promotion Agency.
Hawa dang e jubab u Conrad, da yieñ u MLA ka liang pyrchah u Ardent Basaiawmoit wow pyrchah deiwa ong wa da jrong ware jubab u neibhah wa kani toh ka ‘Short Duration Discussion’ wei ka jubab wa toh u e leh toh u man ko kawa tbian, wei O leh man u uwa da pynkhreh wow yatai heiyatoh waka Land Transfer Act, deiwa pynrap wa manda e jubab toh u man ko 10-15 minit donhi katkam ki kyndon tangwa neiliang u Lamphang da e laad u ya u Montri Rangbah wow pyndep u yei jubab u.
Ha i por wa pynthut u Ardent, u Conrad da klam u la kamwa 28 minit.
U Conrad da ong u wa hawa em wa wanrah ka phang hap u wow e ka jubab wa biang wei da pynche chooh chooh wa kani ka Industrial Zone toh kawa emkaam yow poi cha ka thong wow man ka jylla kam ka Rs. 85,000 klur Economy wei wow pynmih leh ki 5 lak tylli ki kreh wa da kular.
Neiliang u Conrad da pynkut u yei klam deiwa ong wa hawa e yei pynche em won ki wym kwah u ap.
Discussion about this post