Ynne ka sngi ki seiñ kamai kari (Tourist) ka Ri-loom Jaiñtia hapoh ka lama All Jaiñtia Commercial Vehicle Association (AJCVA) da pynman ki ya i yakhih kdoh lama rong yong wa i rah ya ki Banner wa Placard neidaw wa ku dor ware i bai phñiang wa ka bai Permit kari ha ka chi snem.
Kam wow kdaw heini i dor phñiang kari (Petrol wa Diesel) dang ku dor i kat dang lai ki sngi wei ini da ktah i ya ki paidbah kamjooh leh ya kiwa kamai kari.
Ki seiñ ki kari kamai wa chimbynta ha kani ka yakhih kynthup ki ya kini hawah:
- Jowai Shillong Tourist Cab Association
- Jowai Ladrymbai Khliehriat Tourist Association
- Ksehrynshang Namdong Tourist Association
- Khanduli Tourist Association
- 7 Shnong Tourist Association
- Mynsngat Tourist Association
- Nartiang Tourist Association
- Ummulong Tourist Association
- Jowai Amlarem Tourist Association
- Mustem Tourist Association
- Iongnih Tourist Association
- Sahsniang Tourist Association
- Mootyrshiah Tourist Association
- Raliang Tourist Association
- Shangpung Tourist Association
- Barato Tourist Association
- Muthlong Tourist Association
- Nangbah Tourist Association
- Pasyih Tourist Association
- Kyndong Mynso Tourist Association
- Jowai Shillong Tourist Alto 800.
- Ladrymbai To Kalain Tourist
- Bri Sumer Tourist Association
- East Jaintia Driver Owner Association
- Pammanik Tourist Association
- Saphai Tourist Association
- Laskein To Shillong Tourist Association
- East Jaintia Tourist Association
- Tamu Tourist Association.
- Nongjngi Tourist Association
Ka bai Permit kari da pynkylla na ka le jylla (chong hei jied katkam kiwa emkaam, kam ka nongmuna: ye u Jied Assam, Meghalaya wa Mizoram wei kiwa ym kwah ya ka Mizoram ye ki wow jied ya ka Arunachal Pradesh) cha ka All India Permit ya ki kari khian heiwa da pynku dor leh ya ka na ka T. 2,900 chi snem cha ka T. 15,000 chi snem ya ki kari khlem AC katwa kiwa em AC won cha ka T. 25,000 chi snem.
Ynne ka sngi ki seiñ kamai kari da rah ki ya ki Banner wa ki Placard wow beiñ ya ka sorkar jylla, hajrong ini i leh yong ka wa i ku dor i phñiang.
Uwi na kiwa kamai kari da ong u wa u Commissioner & Secretary ka chnat Transport ka jylla hajrong i pynkylla ya ka Permit na ki le jylla cha ka All India Permit da ong u wa ini toh i rai ka sorkar pyrdi wei ka jylla ymye ko wow leh iwon iwon hajrong ini. Neiliang uni uwa kamai da kylli u iyi u myntoi u em ka sorkar jylla lada ymye ko wow yaklam neibynta i hok wa i bha i miat yong ki tre kari wa kiwa kamai kari kiwa im du hapoh jylla donhi?
Neiliang u Jphn Lyngdoh uwa man kam u General Secretary ka JSTCA, da ong u wa neiliang yong ki da dap ki dei sñiawkhia hadien wym ap ka sorkar ya ki heiwa da lai ki cha ka sorkar heiwa da e dorkhat ki cha ka wow pyndam chwa u pynkrehkaam ya ka All India Permit neibhah wa boon na ki toh kiwa kamai ha Ri-Khasi Jaiñtia donhi kamtæ da kyrpaad ya ka sorkar wow pynneh chwa ya kani ka Permit donhi wei teiñkhat donhi wa lai ki cha Assam.
Da ban u wa i pynkrehkaam ya kani ka All India Permit da chem wa da man ko kawa sy’ad dor ware wei ini da chem chitom bha ki neibhah kam kiwa kamai kari u khih ki wow pyndap ya ka bai kot kari namo wow su ya ka bai baam ki khon?
Chooh chooh da ong u wa ka sorkar da booh ko ya ka 30 tarik wow elaad wow pynthymme ya ki kot kari wei lada ymye u pynthymme yeini daw chah daiñ kuna ki wei ki leh da chem chitom bha ki nei em ki Lockdown wa ar sien ha kini ki snem ban-ban, kamtæ neiliang ka seiñ da kyntu u wow pyndam chwa ya ka All India Permit wei wow pynneh chwa ya ka 3 State Permit.
U Paila Lyngkot uwa man u President ka AJCVA, da ong u wa ynne ka sngi da rai wow pynman ya ka yakhih ha East wa West Jaiñtia toh wow beiñ ya ka sorkar kawa lehbeiñ ya kiwa kamai kari khamtam hadien ka Lockdown ka sorkar da pynku ko ya ka bai Permit, wei wot i phñiang kari leh da ku i chawa palat.
Heiyatoh wa ka All India Permit wa mih hukum na Delhi, da kylli u iyi i kaamram ka sorkar jylla kawa ymye wow yada ya ki khian paaid, wei lada kiwa mihkhmat ymye ki u yarap ya ki tæ iyi u myntoi ya ki wow em ki ha ka chuki kamtæ da ban joor u wow chimkhia noh ka sorkar hajrong ini i eh i khoo wa chem ki waroh.
Da em leh ki kattu katni ngut kiwa kamai kari kiwa da pyrkhat wow dam noh u kamai kari neibhah wa ym im de ki nei ku i dor phñiang wei ini i leh ka sorkar heiyatoh wa ka Permit.
Ha kani ka sngi da pynman leh ya i lai Rally ki kari kamai kam ka dak wow pynyoo ya ka sorkar wa ki kari kamai yatylli ki neibynta i hok yong ki.