Ka KSU-Laban Circle da thoh ko cha u Montri wa pait ya ki Kaam Pohyung, u Prestone Tynsong pyrchah yeiwa leh embor ki pulit ka Laban Police Station deiwa kem ya kat wa yoh hi-eh khamtam ya ki Khasi.
Neiliang ka seiñ da pyntip ko wa hei janmiet ka 12 tarik uni u bnai da em i yachoh hapyrdi ki ar liang ki khynroo kiwa em 16-20 snem i rta du neidaw ka poisa heiwa chiliang toh ki Khasi katwa kiwi won ymtoh ki Khasi kiwa chong wa sah ha thaaiñ Laban wei kini toh kiwa ya tipmit para ki wei em leh kiwa yatoh lok.
Hadien wa da ye u pynbait ya ini, waroh arliang da liwan yung ki tangwa ki pulit ka Laban Police Station dei yong ki hi i bor da lai ki chei yung ki wym toh ki Khasi wei da phah ya ki wow wan cha Police Station yow e FIR ya ki Khasi wei neiliang kini ym em kwah ki wow e FIR neibhah wa man ki chi lok. Hei janmiet won ki pulit da khut ki ya ki khynnah Khasi yow wan cha Police Station wei manda poi ki da chah kem ki wei ym khana ki leh yei daw.
Ha ini i jooh i por da em kiwa pynpoor yei dur ha WhatsApp wa em u bru wa chah dung ha Laban hadooh wa yap tangwa ini i dur toh yong u bru wa da heh rta uwa da khlaad ha ki sngi wa dadep chwa.
Ki pulit da kem ki ya ar ngut ki khynnah Khasi wei da pynngat ki ha ki kyndon wa thmu u tynyap bru, ka kyndon rahbor ya ki bru dei thmu wow tynyap wa ki kyndon pynmynsoo bru.
Neiliang ka seiñ da ong ko wa ini i rukom leh ki pulit toh du wow pynmih yei sñiaw yaphær jaitbru wei wow pyndik ya kini ki khynnah Khasi kiwa da pynlait noh haka 13 tarik da ka yung bichaar kawa da ong wa ini i chah pynbaad ki toh kiwa khlem em sabut.
Ka seiñ da beiñ ko yeini i rukom leh ki pulit kiwa pynbor wow e FIR hadooh wow pynkhreh (Draft) ki da pyn da ki yaka FIR pyrchah ya ki dkhot ka seiñ.
Da e nongmuna yeiw jia ha Laban hi heiwa 2-3 ngut ki Khasi da chah dat ki ha ki 10-15 ngut ki wym toh ki Khasi kiwa man ki Muslim kiwa sah ha Laban haka 6 tarik uni u bnai tangwa ki pulit ym em leh ki iyi iyi wow kem wot hadien wa da tip yei pyrtuid wei thaw sah kini ki bru, wei ini pynyoo yei leh chiliang ki pulit pyrchah ya kiwa chong chnong tynre.
Chooh chooh da kdaw leh yei wym em chah kem kitu ki bru wa pynpoor yaka khubor thok.
Discussion about this post