Wa pynksan ka High Court ya i bor u CEM, khut biang u Latiplang ya ka Grace

Shillong: Hadien wa ka High Court ka Meghalaya da pynksan ko ya i bor yong u CEM ka KHADC wow thung ya ki EM wa Dy.CEM, u CEM u Latiplang Kharkongor ynne ka sngi, da khut biang u ya ka MDC samen na Nongshken ka Grace Mary Kharpuri wow wan uiñ biang hadien wa da yut ko cha kawi tawon ka kynhun.

Rap nachwa, u Latiplang da phah u ya i pyrtuid ka Grace cha ka yung krehkaam u Lat wow tipmit yaka kam ka Dy.CEM deilang wa ki soo ngut kiwi kam ki EM.

Hawa klam ynne ka sngi cha ki laad pathai khubor, u Latiplang da ong u wa chong ha ka Grace Mary Kharpuri neibhah ka kynhun United Democratic Forum (UDF) da khut biang ya ka wei da tyrwa wow e ya ka jooh ka kyrdan Dy. CEM lada wan uiñ biang.

Hawa pynrem ya i leh ka sorkar jylla kawa da wanrah ya i kynrum kynram ha kini ki sngi ha ka Council khamtam wym tipmit ya oo kam u CEM, u Latiplang da ong u wa ki District Council ki krehkaam ki katkam ka 6th Schedule ym toh ka 7th Schedule. Da ong u wa i leh ka sorkar toh i leh Politics ka wym yieñ ha ka aiñ wei da yoo wa ka chnat District Council Affairs (DCA) ym tip ko iyi iyi leh hajrong ka District Council.

Related posts

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

Phah u Himanta wow tyngkheiñ yei kjat kiwa yaroh ya ka Pakistan

May 2, 2025

Da ong u wa i pynbna ka sorkar jylla wym em CEM ha KHADC da man biej ko ha khmat ka pyrthai ha kawa ka Kashari da pynksan ko ynne ka sngi. Kawa da ong wa kitu kiwa kam wa ka UDF da khian paaid ki, toh u wan ki cha ka dorbar wow pynyoo bor ym toh du wow klam cha madan.

Katwa u Pynshngain N Syiem u Chairman ka Council uwa da emlang ha ini i yaklam cha ki laad pathai khubor wa u CEM nalor ki MDC ka Congress, da ong u wa man ko i sñiawkmen wa ya i bor man laitlooid ka Council ym ye wow tuklar da kiwon kiwon katkam ki kyndon ka Assam-Meghalaya Constitution of Autonomous District Rules 1952.

Da ong u wa i pynslem wow tipmit ya ki EM, man ko i rem ka sorkar jylla, kawa ong waroh chi kattu wa ym em CEM.

Ha i jooh i por, da ong u wa lada ka Grace Mary Kharpuri ym bien ko wow wan uiñ biang cha ka kynhun UDF, daw pyntip cha u Lat wow pynhaap yow thung da uwi won.

U Lamphrang Blah da ong u wa da dep yaklam wa u Batskhem Ryntathiang u MDC ka Congress na Mairang uwa da yut yow kyrchaan ya ka United Democratic Alliance (UDA) wow wan uiñ biang cha ka UDF.