Ynne ka step da em ar ngut kiwa da sdien pasi ha Shillong, uwi ha 3Mer, Upper Shillong wei uwi won da leh u yeini ha pchem ka Laban Police Station, wei ym em ki dak ki chin wa pynyoo toh wa chah pynyap.
Heiyatoh wa uwa pasi ha Laban, u Superintendent of Police ka East Khasi Hills, u Vivek Syiem da pyntip u wa utai u bru toh uwa tip pyrtuid kam u Mithun Gurung (38 snem) uwa sah ha Lumparing.
Da khana wa ynne i step heipor 6:30 haroh, uwi u Home Guard da yoo u ya utai u bru wa lai u chawah chaneiñ ha u sarok wa em hajan ka Police Station, wei heipor 6:43 da psiah u chapoh ka Police Station wei heipor 6:50 da chem wa da sdien pasi ha u chrot ka lama uwa em ha pchem kani ka thanat.
U SP da khana u wa yei met da pynkit noh cha NEIGRIHMS wei ki pulit dang yang ki ya ka Post-Mortem Report.
Heiyatoh won wa uwa pasi ha 3Mer, u SP da khana u wa heipor 5:00 waje i step ki bru wa lai phet step da yoo nyngkong ki ya uni u bru kiwa da lai pyntip cha ki pulit.
Uni u bru da tip pyrtuid kam u Vijay Kumar Singh (21 snem) wei uwa sah ha Laimer Riatsohkhlur wei yei metyap da pynkit cha NEIGRIHMS yow leh Post-Mortem.
Katkam wa pyntip u SP, hei doh i pran ki ar ngut ym em ki dak wa takha wei katkam wa man kattæ da yoolakam wa pynyap hi ki.
Discussion about this post