Kiwa chong chnong ka Len Mawtep (A) kawa em ha Sohiong, ynne ka sngi da mih paidbah ki wow pyrchah joor ya i leh embor ka yung krehkaam yong u Block Development Officer ka Sohiong C&RD Block deilang wa kiwa yalam chnong, kiwa da pynkreh yabor ya ka madan chnong wa da chna na ka Scheme Pradhan Mantri Khanij Kshetra Kalyan Yojana (PMKKKY), ya kawa hadooh katni ym em iwon iwon i pynche paidbah hakhmat ka dorbar chnong yow yoh chwa i mynjur na ki paidbah kiwa chong wa sah hapoh u pood u ang yong kani ka chnong.
Ha i por wa ki paidbah lai ki wow pynsangeh ya i pynkreh ya katai ka madan, da mih i kulmar wei da chit syndet nei ya pynyoo nia da kiwa manbei, ki waheh wa ki khynroo pyrchah ya u Sordar wa kiwa bood yong oo. Ha ini i kulmar da em leh i sdang wow pynyoo bor hapyrdi kiwa kyrchaan ya kiwa yalam chnong wa ka liang wa dawa wa toh u sai madan ya kiwa baam-tooh na kani ka Scheme.
Hadien wa da yoo ya ini i huri hura, ki pulit ka Sohiong wa Mawngap kiwa da em chwa ha katai ka thaw da ye ki wow kdooh u khoom ya ki arliang mamla, wei da pyn jai-jai ya ka huri hura deiwa pynyakhlaad noh ya ki paidbah, heiwa neiliang ki pulit da pynsangeh noh chwa ki yei pynkreh ya katai ka madan.
Katkam i ong kiwa chong chnong, u Budsuk Sungoh uwa man u BDO da kam u wa da phah ya kiwa yalam chnong wow pynman ya ka yalang paidbah ha ka 12 tarik Thohlakhmi (Feb) 2021, tangwa ya kani ka yalang da pynman sop sop khlem da tip ki paidbah, wei u BDO da kam u wa em 60 ngut kiwa da soi wei e bor ya oo wow pynkreh noh ya i chna ya kani ka madan.
Neiliang kiwa chong chnong, da dawa ki wa u BDO toh u pynche chwa hajrong i wiar ka poisa kawa T. 22 lak 50 hajar heiwa na ka RTI da chem wa ya kani ka poisa ha ka 28 u Thohlakhmi u snem 2020 da sai yaka, wei da sai biang ya katai ka poisa ha ka 6, 20, 27 wa ha ka 30 tarik u Wisu yong u snem 2020. Kiwa chong chnong da dawa ki leh wa u BDO toh u pynmih u yei pyrtuid yong kitu kiwa yoh myntoi na ka Scheme PMKKKY, wei da dawa leh wa u BDO toh u pynmih u ya i pyrtuid yong kitu kiwa chong chnong kiwa soi wow e yei mynjur yong ki wow pynkreh ya i madan.
Ha ini i huri hura, uwa lum khubor yong u t7 News leh da chah ktah kti u ha u Sordar warim yong ka Sohiong, u Komel Nongbri katwa dang lai u wow lum khubor wei riñdur ya ini i lai pynsangeh kiwa chong chnong ka Len Mawtep (A) ya i pynkreh ya ka madan wa pynbaad wa em i baam-tooh wa da poi T. 22.5 lak lyngba ka Scheme PMKKKY.
Uwa riñ dur yong u t7 da chah kynjroi ka Camera wei chah ktah kti u leh ha u Komel khlem iwon iwon i daw, katwa dang pynrchang wow lai klam hajrong i huri hura wa mih ynne ka sngi, wot hapyrdi wa em ki pulit ha katai ka thaw.