Ka Meghalaya Cricket Association da wai ko ya ka thaw yaleh Cricket namo ka Cricket Pitch kawa da dep pynchna pynthymme deilang wa ki Cricket Box Nets ha St. Anthony’s Mini Stadium ha ka 6 tarik uni u bnai.
Neiliang ka MCA da mihkhmat da u Honorary Secretary, u Gideon Kharkongor wa kiwi kiwa ksoh kaam kiwa da yarap ya ka St Anthony’s School Cricket Academy deiwa pynbiang ya kini kiwa emkaam kam ki Nets wa u Astroturf Wicket. Neiliang ka Academy da e ko leh yei Coaching cha ki khynnah na ki skur wa em ha kylleiñ ka Shillong.
Ka St. Anthony’s HSS toh kawa da embynta bha ha ka Cricket nadooh nachwa heiwa ha kani ka sngi da wan wow wai ya ini da u Vice-Principal, u Fr. Anthony Wahlang uwa da pynsñiaw yei sñiawngooh ya ka MCA khamtam ya u Honorary Secretary uwa da wan dei bru yow pait yei pynchna ya kani ka thaw yaleh Cricket. Da ong u leh wa ini i ya krehlang daw yarap bha ko ya ki khynnah kiwa ka-it ha ka yalehke khamtam ka Cricket iwa daw e leh yei chait i khiah.
U Kharkongor da klam u chaphang ki phaw snem i ya krehlang hapyrdi ka St. Anthony’s Cricket Academy waka MCA. Da yaklam u leh wa ki khynnah ka Academy yow pynchlur ya ki wow pynemkaam hok ya kini ki thaw yalehke.
Neiliang ki khynnah leh da muja bha ki hawa yoh u yaklam wa ki bru ka MCA wei da pynsñiaw ki leh yei kmen ya iwa da yoh ki na ka MCA.
