Ka Society for Urban and Rural Empowerment (SURE) ha ka 30 Khonchonglad, da wai ko sa iwi i dukan dai baam ha chnong Cham Cham ya kawa tip kam ka Mei Ramew Cafe namo ka Mother Earth Cafe, East Jaiñtia Hills District.
Ini i wai ya ini i dukan toh kam chibynta yong kawi na ki Project yong ka “No one shall be left behind initiative” hei yakrehlang wa ka North East Slow Food and Agro Biodiversity Society (NESFAS) kawa da e yarap da ka Rural Electrification Commission (REC).
Ka chnong Cham Cham jngai ko kamwa 33 Km na Jowai wei kamwa 24 Km na Khleihriat wei em ko chiboon ki thaw uiñke suwari kiwa kynthup ya ka kchaaid Moopun –Mutong, kchaaid Rynji, Sahksaw–Cham Cham, kchaaid Latang–Lumchyrmit, Kchaaid Umbyrlein–Rangad wa kiwi kiwi.
Ha ka yalang wow wai ya kani ka dukan da chimbynta da kiwa kitkaam chnong, ki manbei manpa, kiwa sikai, ki ASHA wa ki kattu katni kiwa pynbha pynmiat ya i dukan.
Neiliang u wahech chnong ka Cham Cham, u Luh Dkhar da khana u wa ini i dukan toh iwa da rim bha wei man i leh iwa nyngkong dooh ha chnong wei da e khublei u ya ka SURE kawa da pynman sakhiat ko yeiwa da thmu wow leh wei da em boon ki chnat kiwa klam wow pynneh ya ki baam tynre wei ka SURE won da leh ko yei kaam wow yoh u wai ya i dukan Mei Ramew Cafe hapoh ka chnong wei da yoo ya ki tiar kiwa da thaaiñ (Handicraft) ki baam tynre khnang wa ki paidbah u tip ki yei rukom im ki bru ha kani ka thaaiñ.
Ka Roly Phawa kawa man ka tre ini i dukan da ong ko wa emkaam wow man kawa kreh chitom wow pynmiat chooh ya ini i dukan.
Neiliang ka Pasqualina Lamare kawa man kam ka Associate ka SURE da ong ko wa ini i dukan man i iwa ar wa da ye ko u wai wei ini i dukan da man i iwa nyngkong hapoh ka District wei dei em ini i dukan daw yarap i hei yoh i la ki paidbah kani ka thaaiñ.
Ka Somja Phawa kawa man kam ka Field Coordinator ka SURE da ong ko wa i baam tynre toh iwa tei ya i doh i pran ki bru deiwa kyntu leh wow rep ya ki jhoor wei wow ri mrad khnang wa ki baam wa dai ha dukan toh kiwa pynmih napoh ka chnong wei kamjooh leh wow thaaiñ ki rap boon ya ki tiar khnang wow ye u dai ya ki hapoh ini i dukan.
