Amlarem: Ka Laishnong Higher Secondary School kawa em ha chnong Nongbareh toh ka skur kawa da seiñ nadooh u snem 1992 da ki le tylli ki chnong, ka Nongbareh, ka Amkoi wa ka Khonglah.
Hadien ki kattu katni snem ka chnong Khonglah da seiñ ko ya ka yong ka hi ka Secondary School. Hei thaw ka Khonglah da wan da ka chnong Kudengrim wow embynta lang wa kani ka Laishnong Higher Secondary.
Hadien wa da lai da ki boon boon snem yong kani ka skur ynnin ka 16 tarik da man ka sngi sahkynmo ya kini ki le tylli ki chnong heiwa da yoh u booh moo nongrim ya ka yung skur wow chna thymme lyngba ka Supporting Human Capital Development Project ka wa yarap poisa da ka Asian Development Bank (ADB).
Da wan wai ya uni u moo nongrim da u Dy. Chief Minister yong ka sorkar jylla u Prof. R.C. Laloo kam u kongsan hei emlang u Stephanson Mukhim, Parliamentary Secretary, u Executive Chairman yong ka MBOSE u E.P. Kharbhih, ka SDO (Civil) yong ka Amlarem Sub-Division ka I.W. Laloo, ki MDC deilang wa ki Waheh chnong, ki khynnah skur wa ki paidbah.
Ha kani ka sngi neiliang yong ka SMC yong kani ka skur da kyrpad ki ya u Dy. Chief Minister yow yarap ya kiwa emkaam yong ka skur kam i kær ya u pood u ang ka skur, u pynbiang ya ki Quarter yong kiwa kreh wa ya ka hostel yong ki khynnah kynthai wa chynrang yong kani ka skur.
U Prof. R.C. Laloo hei klam yong oo da kyntu u ya ki khynnah skur u man ki kiwa minot wei kiwa kreh chitom neibhah du i kreh chitom donhi wow ye u pynpoi yaki cha ka thong.
Da e nongmuna u pynda oo ya oo hi deiwa ong u wa oo da poi u chadooh i kyrdan wa em u katni toh nei kreh chitom u hadooh wa man u leh kam u Professor.
Discussion about this post