Ka Montri ka chnat i chait i khiah, ka Dr. M. Ampareen Lyngdoh ynne ka sngi da wai paidbah ko ya ka kor X-Ray ha Smit Primary Health Centre deiwa emlang u Dr. Joram Beda, Commissioner & Secretary ka chnat Health and Family Welfare wa u Dr. F. V Kharshiing, Director of Health Service (MI) wa kiwi de.
Hawa e yei klam, ka Ampareen da ong ko wa da wan ko ym du wow wai ya kani ka kor tangwa u pait leh yei kreh ya kani ka PHC heiwa ha ki bnai wa da lai, da yoh ko yei kyrpaad na ka dorbar chnong yow pynku kyrdan ya ka PHC cha ka CHC heiwa i thaw leh da yoh wei da pyntip ko wa ki Engineer da leh ki yei kaam yong ki.
Kamtæ da ong ko wa da emkaam u biang i emyatoh hapyrdi ki paidbah wa ki sahep sorkar yow poi cha ka thong wei da phah ko leh ya ki heh ka chnat wow pait ki yeini wa da tyrwa ka dorbar chnong.
Da ong ko leh wa i thong toh wow chakri ya ki paidbah ymtoh du wow pait kiwon kiwa kjut wa chitom tangwa iwa emkaam toh yow pyntikna wa ye u pynim ya kiwa emkaam yarap. Kamtæ da kyntu ko ya waroh nadooh ki Doctor wow ya krehlang ki yow pynlai bait yei krehkaam ka PHC.
Discussion about this post