Jowai: U Deputy Commissioner ka West Jaiñtia Hills District u Garod LNS Dykes, ynne ka sngi da wai pyrda u yaka 36th State Badminton Championship ha Jowai wa pynlai daka West Jaiñtia District Badminton Association (WJDBA) ha Khimusniang Indoor Sport Hall.
Kani ka lympung u neh ko soo sngi ka wow kut haka 31 tarik uni u bnai.
Ha kani ka State Championship da wan chimbynta 9 tylli ki District yong ka jylla nalor ka Young Talent Badminton Club Mawlai (YTBC) kawa haap hapoh ka District East Khasi Hills, wei waroh kiwa chimbynta da em ki 170 ngut.
Neiliang u Deputy Commissioner ka West Jaiñtia Hills, u Garod LNS Dykes da e khublei u yaka WJDBA yeiwa ye ko u chimkti ya kane ka Tournament haka sien kawa le, wei kam u khlieh ka District da chim u leh yaka kabu wow pdiang burom ya waroh kiwa wan chimbynta naki thaw waphær waphær ka jylla.
Kamwa ka lehkhooid yaki soodong sookun man ko kawa emkaam bha khamtam haka imlang sahlang, kamtæ da kyntu u leh ya kiwa pynlai kamjooh kiwa chimbynta wa kiwa wan paitke wow man ki kiwa yahkhmat neibynta i lehkhooid, wym toh u noh roi ya i jhep kat chawa yoh.
Da pynrap u deiwa ong wa i man iwa bha tam ya ki bru maya Sport wow man ki kiwa lehkhooid.
Discussion about this post