Shillong: Ka yalang ka Meghalaya Democratic Alliance (MDA) ynnin ka janmiet, da rai wow chna ya ka Core Committee wow pyrkhat ya ka kaam Lamphang kawa sah thylli katni hadien wa da khlaad noh u Dr. Donkupar Roy wei kani ka Committee daw pyndep ko ya kani ka bichaar wan yoh da u kyrtong wa ya hunlang hapoh ka 4 tarik u Naikhynde wow wan, neidaw i jied ya u Lamphang wa thymme u man ko ha kani ka dorbar ka wow sdang nadooh ka 6 hadooh 13 tarik.
Ka rai ka MDA wow e kti cha ka Core Committee wow jied ya u Lamphang, ye u man kam u moochynthut ya ka UDP kawa da kam wa i kaam Lamphang toh u lai cha ka.
Ha kani ka Core Committee, waroh ki Party wa em ha kani ka sorkar u man dkhot ki wow khlieh da u Prestone Tynsong wa kynthup ki dkhot u AL Hek na BJP, u Banteidor Lyngdoh na UPF wa u Metbah Lyngdoh na ka RDA.
Hawa yaklam hadien wa wai ka yalang, u Chairman ka MDA u Conrad K Sangma da pyntip u wa ka yalang da mynjur wow man da i wi i sur wow jied ya u Lamphang wa da e kti ha ka Core Committee wow jied ya u briew wow man kam u kyrtong ya ka chuki Lamphang.
U Conrad da pyntip u leh wa ha kani ka yalang da pdiang sñiawbha leh ya u MLA ka KHNAM u Adelbert Nongrum uwa da wan yasoh wa ka United Progressive Front (UPF) kawa emlang ka PDF, NCP wa u MLA samen u Lambor Malngiang.
Da ini i wan psiah u Adelbert, ka MDA da ku i boon paaid cha ka 40 ngut.
Neiliang u Working President ka UDP uwa man leh uwa yahkhmat ka Parliamentary Party, u Metbah Lyngdoh da ong u wa i chna ya kani ka Core Committee toh neibynta u lai biat hapyrdi waroh wa em ha ka MDA wei kani ka Committee daw chim ko ya waroh ki pyrtuid wow bichaar. Da ong u wa ka Party UDP daw phah ko ya i pyrtuid yong u kyrtong ka Party neibynta kani ka chuki, wei da pynrap u deiwa ong wa ka Party da pynsñiaw ko ha kani ka yalang wa ki Party waroh ki da e lang ki ya i kyrchaan ya u kyrtong ka UDP neibynta kani ka chuki.
Discussion about this post