U Chief Justice ka High Court ka Meghalaya, u Justice Ranjit Vasantrao More ynne ka sngi da wai u ya ka yung krehkaam wa pura ka yung bichaar ka Sohra Civil Sub Division, East Khasi Hills ha ka yalang wa pynman ha Sohra.
Hawa e yei klam, u Justice Ranjit Vasantrao More da kyrmen u wa deiwa wai ya kani ka yung bichar wa pura, i bichaar daw man ko kawa lai bait yow pynyoh yei hok ki bru khamtam kiwa dooh wa duk ka imlang sahlang.
Da ong u wa i bichaar yow yoh yei hok ymtoh du neibynta kiwa em poisa, u Justice Ranjit Vasantrao da ong u wa i bichaar toh neibynta waroh wei ini man ko i thong wa hakhmat dooh yong ka State wa ki District Legal Services Authorities.
Neiliang u Montri ka chnat aiñ, u James P. K. Sangma da pynsñiaw u yei sñiawngooh ya ka High Court hapoh i yahkhmat u Chief Justice, u Justice Ranjit Vasantrao More wa ye u chakri ya ki bru deiwa ong leh wa ka sorkar daw pynkhlan ko yei rukom krehkaam i bichaar hapoh ka jylla.
U James P. K. Sangma da yaroh u leh yei krehkaam ki bru ka PWD (Building), Meghalaya hei wow pyndep yei chna hapoh 3 snem hei dor wa T. 9.38 klur.
Kiwi de kiwa da emlang ha kani ka sngi toh ki Meghalaya High Court Judge, u Justice H S Thangkhiew wa u Justice W Diengdoh, u Gavin M Mylliem, MLA ka thaaiñ, u Balajied K Synrem, MLA, u N A Khan, District & Sessions Judge, East Khasi Hills wa kiwi kiwi.
