Ynne ka sngi u Montri Rangbah ka jylla u Conad Sangma chirup wa u Montri ka chnat Tourism, u Sniawbhalang Dhar wa u MLA ka Jowai, u Wailadmiki Shylla da wan wai ki ya ka 100 Beded Maternal & Child Health Hospital, Panaliar Jowai ha ka yalang wa da pynman ha PWD, Jowai.
U Conrad da ong u wa i chait i khiah ki bru toh iwa kongsan tam ya kani ka sorkar wei nei wan ka kjut khlam COVID-19 da ye bha ko u kreh yei kaam wow pynjanai ya ki thaw sumaar.
Da ong u wa heipor wa wan ka kjut khlam da em chiboon i eh i khor wa chem ka sorkar heiyatoh wa ki thaw sumaar wei da ye u kreh u pynbait leh ya kiwa boon kiyi kiyi wa eh .
Da pyntip u wa ka sorkar da pynpliah ko ya ki thaw sumaar heiwa da chna pynmiat ya hadooh 80 tylli ki thaw sumaar hapoh chi snem wei da ye u wanrah hadooh 1,000 tylli ki pyllong ha ki thaw sumaar ha kylleiñ ka jylla.
Chooh chooh da ong u wa kamwa 200 tylli ki thaw sumaar da yoh bordiñ ki na ka sngi namo Solar Power wei da pyndait leh kiwi ki tiar ki wym baam bordiñ ware wei daw pynlut sa T. 250 klur ha ki thaw sumaar. Da pytntitp u wa da mang T. 150 klur wow chna ya 300 tylli ki Sub-Centres ha ka jylla, T. 12.5 klur wow chna ya ki 10 tylli ki Integrated Public Health Laboratories (IPHL) wa 2 tylli ki Critical Care Blocks ha i lut wa T. 47.5 klur.
U Conrad da pyntip u leh wa ka Meghalaya ye ko u man kawi na ki soo tylli ki jylla ka ri kiwa pynlut chiboon neibynta i chait i khiah katkam GDP ka jylla.
Da ong u wa kam ka sorkar duna ko ha ka poisa poilaiñ tangwa man ko ka sorkar kawa kreh chitom wow wanrah ya ki kaam pynroi deiwa paan yarap na ka sorkar pyrdi kam na ki chnat ka sorkar India wa ka 15th Finance Commission.
Hadien wa wai ya uni u mooyurim yong ka MCH da em ki paidbah wa pyntip wa kani ka thaw dang man ko kawa dang khang, kamtæ da sakhi wa ki dwar wow psiah chapoh yong kani ka MCH ynne ka sngi dang man hi ki kiwa dang khang.
