U Montri Rangbah ka Meghalaya, u Conrad K Sangma ynne ka sngi da wai u ya ka Production Cum Training Center kawa tip kam ka NELA Handloom & Silk Production Unit ha Mawkasiang, Umroh deiwa emlang u MLA ka Mawryngkneng, u Pyniaid Singh Syiem, u Commissioner of Textiles, u F R Kharkongor, u Director, Sericulture & Weaving, ka C B Sangma wa u tre ka NELA Handloom & Silk Production Unit cum Training Center, u James E Dkhar.
Hawa e yei klam, u Conrad K Sangma da ong u wa ka sorkar da kyrchaan bait ko ya ki khynroo wa seiñ khih yow ye ki wow poi cha ka thong ki, khamtam kiwa da kreh chitom hawa lai luti ki kam kiwa seiñ khih. “I lai luti u James toh iwa e mynsien ya kiwi kiwa seiñ khih yow ye ki wow bood yeiwa thrang ki wei wym toh u dooh mynsien ki.”
Da ong u wa ha kini ki 10 snem, daw em kamwa 5 lak ngut ki khynroo kiwa daw thooh kreh wei kini waroh daw hap wow e kreh ya ki leh cha baar ki kreh sorkar, kamtæ ki bru wa seiñ khih daw ye ki wow e kreh ya kini ki khynroo.
Chooh chooh da ong u wa iwi na iwa eh dooh ya ka sorkar ha kini ki snem wow wan toh yow e kreh ya ki khynroo khyllood wei ka sorkar da ban joor ko yei emkaam ya ki bru wa seiñ khih yow man ki khynroo ym du kiwa thooh kreh kamjooh leh kiwa pynmih kreh.
U Conrad da pynbna u leh ya ka yarap poisa kawa T. 10 lak cha ka NELA Handloom & Silk Production Unit yow ye u pynheh yeiwa ye ko u pynmih kamjooh yeiwa ye u e sikai.
U James E Dkhar man u leh uwa da yoh ya ka ‘Entrepreneur of the Month’ Award ha u January 2019. Ka NELA Handloom Training Centre toh kawa nyngkong dooh ka Flying-8 Loom Training Centre ha India.
