U Montri Rangbah ka Meghalaya, u Conrad K Sangma deiwa emlang u Chief Adviser, u Thomas A Sangma deilang wa ki sahep ka chnat Puræ Puthi wa ki heh District da wai ki ya ka yung (Building) thymme ka College of Teacher Education (CTE) kawa em ha Rongkhon, Tura ynne ka sngi kiwa kyntup ya ka thaw puræ kiwa lai M.Ed wa ka Hotel ki khynthai wa chynrang.
U Conrad hawa e yei klam da ong u wa ha kini ki soo snem chiteiñ i rukom pynbiang ya ka puræ puthi wa i yoh i kot ha waroh kawi ka jylla da ku bha i tangwa i pynku ya ka puræ puthi dang chem chitom kamtæ ka sorkar nadooh u snem 2018 da booh ko ya ka puræ puthi hakhmat dooh.
Da ong u leh wa ka sorkar da pynlut ko chiboon ka poisa yow pynku ya ka puræ puthi neibynta kiwa heh kyrdan hawa nujor wa ki snem wa da lai.
Ka Principal ka CTE, Rongkhon, ka Dr. Meena A Sangma, da khana ko wa ha kani ka yung wa da chna katkam ka juk wa katni da em 119 tylli ki Classroom, ki kamra neibynta kiwa sikai wa kiwi kiwi de deiwa ong leh wa ka CTE toh kawi na kawa bha dooh ka chlem e sikai hapoh ka jylla. Hawa khana yeini da ong ko leh wa kani ka thaw emkaam ko sa 90 ngut kiwa sikai kiwa thylli kiwa hap wow pyndap.
U Additional Director of Higher and Technical Education, u A Ali Nagi hawa e ya ki ktien pdiang sñiawbha da khana u wa ya kani ka yung thymme da chna hei lut wa T. 18 klur kawa kyrchaan poisa da ka Asian Development Bank hapoh ka Supporting Human Capital Development in Meghalaya wei kani ka thaw daw pyndap ko yeiwa emkaam kiwa lai puræ B.Ed wa M.Ed katkam ki kyndon ka NCTE.
