theme-sticky-logo-alt
theme-logo-alt
Advertisement ad1
Advertisement ad1
Advertisement ad1
Advertisement ad1
Advertisement ad1
Advertisement ad1
Advertisement ad1

U Mukul man u uwa laitlooid wow dawa takit u Modi hajrong ki Smart Meter: Prestone

U Symbood Montri Rangbah ka jylla, u Prestone Tynsong ynne da ong u wa uwa yahkhmat ka Liang Pyrchah, u Mukul Sangma man u uwa laitlooid wow phah tuklar ha u Montri Rangbahdooh ka ri, u Narendra Modi heiyatoh wa ki Smart Meter.

U Prestone da pynche u wa da dep wow thung ya ka takit wa khlieh da u Judge wa da chong ngiah ka Allahabad High Court hajrong i krehkaam ka chnat Bordiñ wa kynthup lang yei pynkrehkaam ya ki Smart Meter wei yei chem kani ka takit da dep wow e kti cha ka sorkar.

Da ong u leh wa ki sahep sorkar dang puræ bniah ko yeiwa chem ka takit wei ym pu em chem iyi iyi iwa sih.

U Prestone da ong u leh wa ka chnat Bordiñ toh kawa da pynkhreh wei wow pynche mar ya dep u puræ bniah ya iwa chem kani ka takit neibhah ka Report toh kawa rben bha.

Chooh chooh da ong u wa ym emkaam wow wanrah ya kani hapoh ka yung dorbar wei daw booh ya kani ka Report ha ka Website ka chnat Bordiñ yow ye ki paidbah wow bichaar da ki hi.

Da kdaw u leh ya ka seiñ HYC kawa da dep wow leh RTI heiyatoh wa ki Smart Meter wei da e cha ki ya waroh ki kot ki sla nadooh ki soskular wa ki kot thap Tender.

Kam wow pynkynmoo wa ynnin u Dr. Mukul da dep thoh u cha u Modi heiyatoh wa i krehkaam ka chnat Bordiñ hajrong i pynkrehkaam ya ki Smart Meter wa i pynkrehkaam ya ka Saubhagya Scheme.

U Mukul da yooluti u leh wa daw thung u Modi da ka takit kawa pait da ki Ministry ka sorkar pyrdi yow lait wa neini chakhmat wow jia biang kam ini.

Da ong u leh wa ka takit wa da dep thung toh kawa da leh khlem da booh iyi hap wow thooh kamtæ ym chem iyi iyi leh wa lehbakla wei ini waroh toh iwa da sooh buit chwa.

Heiyatoh wa i dor ki Smart Meter da ong u wa katkam wa chem da ki kot ki sla da em chiboon i yaphær hei dor wa mynjur ka sorkar wa i dor wa dai cha yaaw cha haat.

Share this:
Previous

Wai u Conrad ya ka yung thymme ka College of Teacher Education

Next

Cheh kem u tre paar mooyong hadien wa yap uwi