U montri rangbah ka jylla, u Conrad K. Sangma ynne da e khublei u ya u montri rangbahdooh ka ri, u Narendra Modi uwa da raikut wow wanrah ya ki kaam pynroi ha ka thaaiñ mihsngi.
Yeini da ong u heipor wa booh ya u mooyurim wow chna ya u sarok wa 29 km ha Ri-Bhoi District.
Uni toh u sarok na 9th Mile ka NH-37 cha Umsen lyngba na Killing-Pillangkata wei da e poisa lyngba ka Ministry of DoNER hapoh ka North East Special Infrastructure Development Scheme (NESIDS).
Da antaad wow pynlut T. 84 klur neibynta uni u sarok.
U Conrad Sangma da ekhublei u leh ya u montri ka DoNER u Dr. Jitendra Singh wa u symbood montri rangbah uwa man leh u montri ka PWD, u Prestone Tynsong kamjooh leh ya waroh ka chnat PWD kiwa da emkti wow yoh ya uni u sarok.
Da ong u leh wa ka sorkar pyrdi yaleh ko wow wanrah ya ki sarok wa kiwi kiwi ha ka thaaiñ lyngba ka NESIDS wei kam ka sorkar jylla thooh ko yei duna iwa emkaam wow pynkylla.
Chooh chooh da pyntip u wa ka jylla da pynmiat ko yei rukom chna sarok hapoh ka PMGSY, iwa da pynsmat yei pynlait poisa na ka sorkar pyrdi.
Da ong u leh wa u snem (Financial year) wa dadep da pynlait T. 1400 klur ya ka Meghalaya, neibhah wa da ye u chna 800 km ki sarok ha ki le snem.
Kiwi kiwa da em ha kani ka sngi da emlang leh u MLA ka Jirang, u S. Sohtun, u MLA ka Mawhati u D Lamare, MLA ka Nongstoin u Macmillan Byrsat, u Secretary ka NEC u K. Moses Chalai wa kiwi kiwi.
Discussion about this post