Ynne ka sngi u Montri ki kaam pohyung ka jylla uwa man leh u MLA ka Amlarem, u Lahkmen Rymbui da wan wai u ya ka Collective Marketing Center (CMC) kawa T. 7 lak ya kawa da chna lyngba ka Integrated Village Cooperative Society (IVCS) ha Shkenpyrsit.
Ha kani ka sngi u BDO ka Amlarem, u Dr. D. Lyngdoh hawa e u ya ki kyntien pdiang burom wa ki ktien lamphrang, da ong u wa ka Meghalaya Livelihood Access To Marketing Programme (MegLAMP) da psiah ko cha ki 67 tylli ki chnong hapoh ka Block wow kyntu kynrong ya i yoh i laa ki paidbah.
Da ong u wa ka Shkenpyrsit da man ko kawa dapoi bha chaphrang heiyatoh wa i kaam rep wa i rukom kreh ki paidbah.
U Dr. DI Kjam, u District Veterinary and Animal Husbandry Officer ka West Jaiñtia Hills, da ong u wa ka Piggery Mission toh ka jait ram wa e ka sorkar khlem kawon kawon ka sut hadooh T. 20 lak wei ka sorkar kwah ko wow pynchlur ya ki kaam psan mrad hapoh jylla neibhah katkam wa man katni dang boon ki mrad ki doh wa pynemkaam ha jylla toh kiwa wan na baar.
Da khana u wa ki sñiang wa yoh ya ka kjut African Swine Fever ymtoh kiwa phær wei i doh yong kini ki sñiang ye hi u baam tangwa emkaam won wow chet ya i doh hawa ih bha i wei wa kani ka kjut ymtoh kawa bi cha ki bru.
Neiliang u Lahkmen Rymbui hawa e yei klam da ong u wa waroh chi kattu khñium ki warep wa ka sorkar mylliñ ko ki, tangwa ka sorkar neipor cheipor yaleh ko wow yarap ya ki tangwa boonsien ki paidbah jooh chim ki wa ki laad yarap toh ka poisa mynkna tangwa katni ki paidbah da pyrkhat ki kammon wow pynemkaam ya kani ka poisa.
Da ong u wa boon ki wow kylli weileh yoh poisa ki, tangwa lada em i mon wow kreh ka laad daw wai hi ko wei ki sahep ha ki chnat sorkar daw smat ki wow yarap u yahluti yeiwa khih wa kreh ki. Da kdaw u leh ya ki thong krehkaam ka sorkar kam ka Piggery Mission, ka Jackfruit Mission, ka FOCUS Programme wa kiwi kiwi toh emkaam wow chim kabu ya ki.
Chooh chooh da ong u wa emkaam wa ki bru u rep ki katkam wa yah ki thaw deiwa e yaroh leh ya ki paidbah ka thaaiñ deiwa ong, “Nadooh na Amlarem chaneiñ cheini (Shkenpyrsit) hanla ki bru duna ki hei stat tangwa da man ki kiwa kreh chitom,” heiwa da ong u wa ki bru neini emkaam u jied ki ya ki mar kiwa hoi u thung katkam wa man i thaw.
Ha kani ka sngi da yoh leh i klam na u Sub Divisional Agriculture Officer, u C. Najiar; ka ADC ka West Jaiñtia Hills ka D. Syngai, u W. Kyndait na ka Integrated Village Cooperative Society (IVCS), ka Rosely Kasar kawa man kawi na ki dkhot ka Producer Group wa kiwi kiwi.
Ha kani ka sngi da saam leh ya ki Cheque cha ki 81 tylli ki Producers Group namo ki seiñ ki warep lyngba ka FOCUS wa ka MegLAM kiwa kynjoh hadooh T. 64 lak.
