Ynne ka sngi u Montri ka sorkar jylla uwa man leh u MLA ka Amlarem u Lahkmen Rymbui da wai u ya ki mooyurim wow chna pynheh wei wow siang psiang ya u sarok na Amlarem-Pdengshakap-Muktapur wa jrong 14.60 Km ha i lut wa T. 22.12 klur tam lyngba ka Central Road Infrastructure Fund (CRIF). Kani ka CRIF kawa man ka poisa wa yoh ka sorkar na ka dan na i dai Petrol wei ya u sarok u chna da ka PH Construction.
Ha kani ka sngi da wai leh ya u sarok psiang wa da dep chna na Pdengshakap cha Trangblang wa jrong 5.60 Km ha i lut wa T. 3.79 klur wa u sarok psiang ka chnong Pdengshakap (Internal Road) wa jrong 2.90 Km ha i lut wa T. 2.27 klur wei kini ki ar sarok da chna lyngba ka poisa RIDF XXVII.
Ya ka yalang wa pynman ha Pdengshakap da pynlai da u S. Pakynteiñ, Secretary ka chnong Pdengshakap wei da yoh ya ki kyntien pdiang burom na u BW Phria uwa man u SE ka PWD (Roads) Jowai Circle.
U Lahkmen Rymbui hawa e yei klam da ong u wa sñiawkmen u wow yoo wa da wanrah ya ki kaam pynroi hapoh ka thaaiñ Elaka Satpator wei da man ko ka sngi wa da wanrah ya ki kaam pynroi neibhah hadien 46 snem nadooh wa yoh ya kani ka Amlarem Civil Sub-Division da ye u pynku pyrdan leh ya ka Jarain PHC cha ka Sub Division Hospital na ka 5 pyllong chadooh 50 pyllong.
Da ong u wa kam ka Constituency man ko kawa embhah tam neibhah du ha War East hapoh kini ki san snem da yoh hadooh 56.4 Km ki sarok ha i lut wa T. 49 klur.
Da khana u leh chaphang ki kreh wa har rukom nadooh ki sarok, ki skur, kamtæ ter-ter hapoh ka Constituency.
Heiyatoh wa i ong ki bru wa kani ka sorkar boonkaam ko du ha i booh mooyurim, da ong u wa emkaam u pait leh yeiwa da leh ko ha ki san snem wa dadep.
Da khana u leh wa ha Nongtalang College ha u snem wow wan daw sdang noh sa ya ka Commerce Stream.
U Lahkmen da ong u wa ka Election toh kawa chisngi tangwa i chakri won wa san snem wei boon ki wow beiñ wow pynbaad ya oo tangwa ki kaam yong oo wa klam rap thai.
Da ong u wa ya ka Padu PHC u pynku ya ka cha ka Urban Health Centre hanla ymtoh ka chnong sor wei ini toh chong ha kiwa mihkhmat kammon kreh ki.
Da kyntu u leh ya ki paidbah wa ki sahep wow krehlang ki chirup wei u e laad leh ya ki MLA u kreh ki neibynta yong ki paidbah.
Kiwi kiwa da klam ha kani ka sngi toh ki waheh chnong na Trangblang, Pdengshakap, u Dolloi ka Satpator wei da yoh ya ki kyntien khublei na u ED Pakyntein uwa man u EE ka PWD (Roads), South Jowai Division.
