Shillong: U Lat ka jylla, u Tathagata Roy ynne da wai u ya ka 10th East Himalayan Expo ha SRGT 2nd Ground, Polo, Shillong. Kani ka Expo toh kawa pynman nadooh ka 10 hadooh 17 tarik uni u bnai da ka India Trade Promotion Organisation (ITPO) hei yakrehlang waka chnat Commerce and Industries Department, Government of Meghalaya.
Hawa e yei klam, u lat da ong u wa kani ka Expo u man ko ka rynsan neibynta kiwa seiñ khih dei yong ki dahi wei waka thaaiñ mihsngi man ko kawa mahajon bha ha ki mar poh khyndaw wei emkaam wow pyntikna wa da pynkrehkaam hok ya ki.
Ha kani ka sngi da pynlait paidbah leh ya ka kot “10th East Himalayan Expo Guide”.
Ka East Himalayan Expo toh da booh thong wow wailaad ya kiwa seiñ khih na ka thaaiñ wei khamtam hawa ka sorkar pyrdi da booh ko ya ka “Act East Policy”. Ha uni u snem da jied leh wow pynman ya ka ha Shillong neibhah wa man ko sor kawa 100 wa chah jied hapoh ka “Smart Cities Mission” wa ka Atal Mission for Rejuvenation and Urban Transformation (AMRUT).
Ha kani ka rynsaan da em 200 tylli ki Company wa chimbynta iwa man le chah hawa wyrchaw ya u snem wa dadep heiwa da embynta leh ki MSME, APEDA wa CAPART wa kiwi kiwi. Da booh leh ya ki mar wa kynthup ya ki sula, ki dawai kynbat, ki tiar chna kti, ki baam wa kiwi kiwi kiwa da chna da ki Self Help Group, ki bru samen wa kiwi kiwi.
Kani ka East Himalayan Expo 2018 u wai ko nadooh 10:00 waje i step hadooh 6:00 waje i janmiet.
Discussion about this post