Jowai: “Deiwa em kani ka yung daw wanrah ko yei miat i bha hapoh ka District waroh kawi heiwa daw yarap ko ya ka imlang sahlang” da ong u DC ka East Jaiñtia Hills u MS Lhuid ynne ka sngi hawa wan wai u ya ka yung wow ri khonswet kawa em ha Tuber Kmai Chnong.
Ya kani ka yung kawa tip leh kam ka 7Thyndai Child Care Institute Cum Counselling Centre kawa da pait da yoo da pyllai da ka Women’s Wing yong ka Seiñ Raij Tuber, wei ka yalang ynne ka sngi da pyllai da ka Chairperson ka M. Dkhar.
Da yoh ya ki kyntien pdiang burom na ka M. Siangshai, i klam lamphrang na ka Secretary ka F. Ryngkhlem.
U DCPO ka East Jaiñtia Hills, u T. Kyndiah da batai u kajiak chaphang ka aiñ wa tip kam ka Juvenile Justice (CARE AND PROTECTION OF CHILDREN) ACT, 2015.
Ka D. Swer kawa man kam ka DSWO ka District da ong ko wa emkaam chiboon wow leh katkam ka aiñ chwa wow sdang ya kani ka thaw ri khonswet wei dei langær ki sahep sorkar haap lai sylli ki ya kani ka thaw wei emkaam leh u phah ki ya ka bui cha ka sorkar.
Neiliang u MS Lhuid uwa man kam u kongsan ha kani ka sngi da e khublei wei da e yaroh u ya ka Women’s Wing ka Seiñ Raij Tuber kawa da leh ya ini i kaam iwa man kyntang neibhah wa boonsien hi kam kini ki khynnah chah kyntait ki ha ka imlang sahlang.
Kiwi kiwa da klam ha kani ka yalang toh u MDC ka thaiñ u Lasky Rymbai, u MDC na Khliehtyrchi u MB Rymbai, u Waheh Chnong ka Tuber Kmai Chnong u Graham Lyngdoh, wa kiwi kiwi wei da pynkut ya ka yalang da ki kyntien e khublei na ka Executive Member ka Women’s Wing ka T. Lyngdoh.
Ya kani ka sngi da pynphooh da ki chaad, ki rwai da ki khon ka Raij Tuber kiwa wan na kylleiñ kam na Mihmyntdu, Jalyiah, Pamra Kmai, Tuber Kmai Chnong wa kiwi kiwi.
Ha kani ka yung da em chwa 7 ngut ki khynnah kiwa da sah da sumaar kani ka thaw wei da yohbor ko namo da yoh ko ya ka Certificate wow sdang krehkaam ko nadooh ka 24 Naisaphra 2017.
Discussion about this post